[6-text p 339]
¶ Abyde quod she / my tale is nat bigonne [¶ Item viri diligite vxores verecundas]
Nay / thou shalt drynken of another tonne
Er that I go / shal sauoure wors than Ale
And whan þat I / haue toold forth my tale
Line 172
Of tribulacion / that is in mariage
Of which / I am expert in al myn age
This to seyn / my self haue been the whippe
Than maystow chese / wheither thou wolt sippe
Line 176
Of that tonne / that I shal abroche [folio 69a]
Be war of it/ er thou to ny approche
ffor I shal tell ensamples / mo than ten
Who so / þat wol nat be war / by othere men
Line 180
By hym / shul othere men corrected be
The same wordes / writeth Protholomee
Rede it in his Almageste / and take it there
¶ Dame / I wolde praye / if youre wyl it were
Line 184
Seyde this Pardoner / as ye bigan
Telle forth youre tale / spareth for no man
And teche vs yonge men / of youre praktike
¶ Gladly sires / sith it may yow like
Line 188
But yet I praye / to al this compaignye
If that I speke / after my fantasye
As taketh not agrief / that I seye
ffor myn entente / is but for to pleye
Line 192
NOw sire / now wol I telle forth my tale [¶ Bihoold how this goode wyf / serued hir .iij. firste housbondes whiche were goode olde men]
As euere / moote I drynken wyn or Ale
I shal seye sooth / of tho housbondes þat I hadde
As thre of hem were goode / and two were badde
Line 196
The thre men / were goode / and riche / and olde
Vnnethe / myghte they / the statut holde
In which / that they were / bounden vn-to me [¶ Ierephancias quoque Atheniencium / vsque hodie / cicute sorbicione castrari]
Ye woot wel / what I meene of this pardee
Line 200
As help me god / I laughe whan I thynke
How pitously / anyght I made hem swynke
And by my fey / I tolde of it no stoor
They had me yeuen hir gold/ and hir tresoor
Line 204
