þat child wepingue nolde lete:
With a ȝerde sore he it beot,
And euere þat child þe more weop.
ȝeot to þat child spac þe giv:
Line 695
þou schalt for loue of Jesu
In a tour beo put, ȝif i mai,
Al þis ilke longue dai.
þat child he tok sone bi þe chin
And ladde hine to þe prisone In,
Line 700
In a tour starc and strong,
þar on nas bote on in ȝong;
þare inne him seolf þat child was
With oute mete and solas.
þe fader swor þat he scholde
Line 705
In þat tour ale gate beo holde.
þe fader eode forth and lefde him þere
With a swiþe reufole chere,
And of þat tour he tok wit him þe keiȝe
And leide ire fer out of þe weiȝe.
Line 710
Here tok Jesus þat child out of prisone, þare as it was for enchesun of him, ake Jhc wuste wel al heore dedes and halp þat child.
JEsus wuste al heore þouȝt,
And to longue ne bi lefde nouȝt
þat he to þat child ne cam
And seide: felawe, here ich am,
Ovt of a nuy to bringue þe,
Line 715
In ȝwuche þou art nouþe for me;
Tac me þi fingur a non riȝht
Ovt at þis hole, ȝif þou miȝht!
He spac and seide: a Jhesus ay,
I ne wene nouȝt þat i may:
Line 720
þat hol is to narouȝ and to streit;
To comen out i ne can no red.
Jhus seide: ȝwat hast þou i seid?
þou schalt come out with guod espleit.
