Altenglische legenden ...

                                
                                  A litell salue, sir, suth it es,
                                
                                  May medcyn a full grete sekenes:
                                  Line 770 
                                
                                  So pouer prayers and pouer dede
                                
                                  Of god may get us ful grete mede;
                                
                                  Here of oure self we haue bot syn,
                                
                                  Oure gudenes of god bus bigyn;
                                
                                  To me grete giftes gyfen has he,
                                  Line 775 
                                
                                  For to his liknes made he me
                                
                                  & gaf me wit & resoun right,
                                
                                  & heuyn blis he has me hight;
                                
                                  To him me aw wirshpid to do [wirshpid st. wirship.] 
                                
                                  þat swilk grete giftes has gifen me to.
                                  Line 780 
                                
                                  Hir stabill faith þus when he felde,
                                
                                  His hert gun haly to hir helde.
                                
                                  Vn to hir fader he went bilyue
                                
                                  And said he walde wed hir to wiue.
                                
                                  Hir fader was þarof full faine;
                                  Line 785 
                                
                                  Bot þus he answerde him ogaine:
                                
                                  To wed hir, sir, will noght a cord,
                                
                                  For þou es sun to a grete lord
                                
                                  And we er pouer in simple state;
                                
                                  þow will nogh(t) wed hir, wele I wate. [Ms. nogh st. noght.] 
                                  Line 790 
                                
                                  þe childe said how his hert was set,
                                
                                  & hir to haue none solde him let.
                                
                                  þe pure man saw þan purpose,
                                
                                  And his werk was him lath to lose.
                                
                                  He said: sir, all yf þou hir wed,
                                  Line 795 
                                
                                  So may noght be furth with þe led:
                                
                                  Oþer help bot of hir haue I none, [so = scho.] 
                                
                                  Scho may noght leue me here allone.
                                
                                  þe childe said: sir, with gud chere
                                
                                  I sall dwell here with zow in fere,
                                  Line 800 
                                
                                  & confourme me to zoure astate,
                                
                                  & do zoure will arely and late.
                                
                                  In pouer wede sone he him cled,
                                
                                  And þe pouer woman so he wed.
                                
                                  þai lifed and died in goddes law.
                                  Line 805 
                                
                                  And, sir, I se wele by þi saw
                                
                                  þat to þis same þou profers þe,
                                
                                  þat sais þt þou will wend wt me
                                
                                  To wildernes, and wote noght whare,
                                
                                  & leue þi welth and þi wele fare.
                                  Line 810 
                                
                                  þan Josaphat un to him said:
                                
                                  þis tale may wele to me be laid:
                                
                                  All likyng will I leue here stil
                                
                                  And wende with þe who so þu will.
                                
                                  Bot, fader, tell me, and none els,
                                  Line 815 
                                
                                  How olde þou ert, and whore þou duels?
                                
                                  Berlam answerde on þis manere:
                                
                                  I am olde fourety and fyue zere,
                                
                                  In wildernes I dwell sertaine.
                                
                                  þan Josaphat answerde ogaine:
                                  Line 820 
                                
                                  Fader, þine elde yf þou wolde ken,
                                
                                  þou semes of sexty zeres and ten.
                                
                                  þan berlam sais: yf all ware tolde
                                
                                  Sen I was born, I am so olde;
                                
                                  Bot ferrer zeres none tell I can
                                  Line 825 
                                
                                  Bot sen tyme I was cristes man;
                                
                                  þat oþer tyme I tell for dede,
                                
                                  For to me standes it in no stede.
                                
                                  þan Josaphat fast made him boun
                                
                                  With berlam for to wende of toun
                                  Line 830 
                                
                                  To wildernes, whore he wolde go.
                                
                                  He said: sun, it may noght be so,
                                
                                  We myght noght so escape fro skath;
                                
                                  þerfore es better for us bath
                                
                                  þat þou at home here hald þe still
                                  Line 835 
                                
                                  And cum to me sethin at þi will.
                                
                                  He baptist him þore with his hend
                                
                                  And trouth of crist clerely him kend;
                                
                                  He kissed him þan als custum es,
                                
                                  And went ogain to wildernes.
                                  Line 840 
                                
                                  And Josaphat þare dwellid still,
                                
                                  And loued god euer loud and still.
                                
                                  Till at þe last his fader herd
                                
                                  Of his dere sun how þat it ferd,
                                
                                  And berlam þore had him baptist
                                  Line 845 
                                
                                  And turned him to þe laws of crist.
                                
                                  So mekill sorow in hert he had
                                
                                  þat nonekyns myrth myght mak him glad.
                                
                                  His mane un to a frende he mase
                                
                                  And askes his counsaill in þat case,
                                  Line 850 
                                
                                  In þis bale what ware best to do.
                                
                                  And þus he answerde him un to:

About this Item

Title: Altenglische legenden ...
Author: Horstmann, Carl, ed. b. 1851.
Canvas: Page 236
Publication: Paderborn,: F. Schöningh,; 1875.
Subject terms: English poetry; Legends

Technical Details

Collection: Corpus of Middle English Prose and Verse
Link to this Item: https://name.umdl.umich.edu/afy7823.0001.001
Link to this scan: https://quod.lib.umich.edu/c/cme/afy7823.0001.001/280:7.2

Rights and Permissions

The University of Michigan Library provides access to these materials for educational and research purposes. These materials are in the public domain. If you have questions about the collection, please contact [email protected]. If you have concerns about the inclusion of an item in this collection, please contact [email protected].

DPLA Rights Statement: No Copyright - United States

IIIF

Manifest: https://quod.lib.umich.edu/cgi/t/text/api/manifest/cme:afy7823.0001.001

Cite this Item

Full citation: "Altenglische legenden ..." In the digital collection Corpus of Middle English Prose and Verse. https://name.umdl.umich.edu/afy7823.0001.001. University of Michigan Library Digital Collections. Accessed June 22, 2025.

Altenglische legenden ...

Annotations Tools

Actions

About this Item

Technical Details

Rights and Permissions

Related Links

IIIF

Cite this Item