þoruȝ massene, and þoruȝ oþur beden, : and þoruȝ almes dede
Man mai hore pine muche a legge : and þe sonore ovt þar of heom lede.
Line 545
And ȝwane ani of heom hidere comez, : aȝen him we wendez ech on,
Ase we duden a ȝein þe, with Joye, : and ledez him In a non.
Ake non of us nis ȝuyt wuyrthþe : in to heuene for to wende,
Ne neuere on not ȝwane ovre louerd : after ani of us wole sende;
For ech man þat in to heuene schal : þoruȝ purgatorie mot,
Line 550
And sethþe into eorþeliche parays, : ase we beoth novþe, wel ich wot,
For þis is ovre kuynde heritage; : iwrouȝt we weren þar to,
Al forto ore furste fader it a gulte, : and for to he hadde mis do;
Here we scholden alle habbe i beon i bore, : and i leoued ore lif also,
For ore louerd wold þat we weren : In þe more Joye i do. [For st. for to.]
Line 555
þei men beon ovt heonnes i cast, : here forth heo moten wende
And aȝen(!), ar heo to heouene come, : aftur heore liues ende.
Ake al þe Joye, þat is here, : nis no þing i wis
A ȝein þe leste Joye of heouene; : wel muche þe meste is.
Sum þing þov schalt of heuene iseo : In a place here neiȝ.
Line 560
He ladde him op on an heiȝ hul, : and bad him bi holde on heiȝ, [Ms. bad him him.] [folio 103]
And axede him of ȝwuch colur were : heuene op riȝt þere.
He seide: him þouȝte riȝt ase gold, : þat puyr wallinde were.
ȝe, seide þis oþur, þis is þe wei : þat geth riȝt to heuene blis,
And þat is þe ȝat of parays, : þat with oute heuene ȝeond is.
Line 565
Ech day some of purgatorie : comez hidere us to,
And some of us to heuene wendez : euer eche daye also,
So þat (we) wexez eche daie : and waniez, þov sixt lo; [fehlt we.]
We nutez ȝwuch of us it schal beo next, : bote as god wole habbe ido.
Ech dai, þe ȝwuyle we here beoth, : ore louerd us fedez ene
Line 570
With riche metes of heuene, : þat swete is and clene; [metes st. mete.]
ȝwuche þulke metes beon, : are þov heonnes wende,
With us þov schalt sone i wite, : ȝwane god it wole us sende.
Ne hadde he bote o word i seid, : þat þare ne cam a liȝte
A manere brez fram heouene a doun, : þat schon wel clere and briȝte,
Line 575
þat ouer spradde al þat lond, : and a cler leome þare with oute, [fehlen in Ms. Bodl.]
And opon euereches heued a liȝte a doun : wel faire, with outen doute, [fehlen in Ms. Bodl.]
And op on þis kniȝtes heued al so, : an þoruȝ him smot a non,
And þoruȝ euerech lime and lith of him : þat swete liȝt gan gon,
þa(t) so muche wille and Joye, : him þouȝte, neuere he nadde. [Ms. þa st. þat.]
Line 580
