Ac a softe wind þer was, . þat he herde vnneþe;
So scharp and cold it blew, . hit brouȝte him to deþe;
Hit wende þorw is herte . and þorw bodi al so, [Vor bodi fehlt is.]
Line 235
þt him were leuere þan al þe world, . & þe pine were ido.
þus heo drowen him, as him þouȝte, . riȝt forþ est iwis,
As þe sonne ariseþ, . whan þe day lengest is.
þo heo comen, as him þouȝte, . riȝt to þe worldes ende,
Heo tornden bi abrod valeiȝe, . & souþward gonnen wende,
Line 240
þideward as þe sonne . at midwinter deþ arise;
Wo was him for drawe . & pined on alle wise.
þo þouȝte him þat he herde fer, . bifore him as it were,
Swiþe deolfol cri . and swiþe reuþfol bere;
Euer þe ner þat he com, . þe reulokere was þe cri;
Line 245
So longe þat him þouȝte . þat heo weren þer bi.
þo comen heo in to a feld; . more ne miȝte non beo,
So long it was in eche side, . þt he ne miȝte non ende seo.
Of men and wimmen þis feld . was fol in eche side,
þe wombe toward þe grounde . abrod isprad wel wide,
Line 250
Vet and honden al abrod . to þe erþe faste ibounde
Wiþ nailes of yre, al furi, . ismite þorw to þe grounde.
þes gostes þus ipined were . wiþ yrenes al of fure;
So deolfol cri heo maden, . þat it was deol to hure;
Heo crieden merci deolfoliche, . ac me nolde non hem do;
Line 255
Vor anguise heo gnowe þe erþe . & here tonges al so.
Deuelen ourne aboute . vpe hem al to grounde,
Wiþ newles heo hem to drowe . wiþ moni a dep wounde.
Alas, whi ne beo ȝe war, . oure sunnes her to bete,
Ar ȝe come to purgatorie, . wiþ luþer gostes to mete?
Line 260
Vor in purgatorie heo beþ . as wel as in helle,
And worþeþ forte þe dai of dome, . telle what me telle.
Heo seiden : as þou sist þese men pined, . þu schalt al so,
Bote þu þi þouȝt turne . and after vs do.
þo he nolde in no manere, . to grounde heo him caste,
Line 265
To turmenten him, as oþer weren, . & to nailen him faste.
Ac he criede to ihū crist, . þo him smart so sore:
þer nas non of hem þo, . þt miȝte greuen him more.
þo þe schrewen ne miȝte . here wille habbe þo,
Heo drowen him into anoþer feld, . ful of more wo,
Line 270
Of men and wimmen fol, . vpriȝt sprad to þe grounde,
