Ruffin was my broþer, . þat tou here sclowe;
Ðe wile e was aliue, . e couþe sunnes inowe;
E dede men to sunne — . þere-fore we loude lowe
Ant yeld here seruise . ofte mid muchele wowe.
Line 200
In a dragones liche . i sende him to þe,
To turne þine herte . ant apaie me.
He is iborsten a-two, . ibounden hauestou me —
A maidain (!) hauet us ouercomen, . noutt nis oure pouste!
Belsebug is my nome — . i ne may þe nout lie —
Line 205
Ne mai ic longe þolien . þe pine þat i drie.
Al ic wolde biswike . þat i sen mitte mid eie —
Nab ic none mitte . þe nou to struye.
Wen ic wist a wif . sculde be bet of berne,
Ic com þider sone, . swift as an erne,
Line 210
Ant, wen i þider come, . to-croke fot oþer arme; [to st. it? od. l. i croked it.]
Ant te wif ir-selue . i fonde to furfarne."
"Haue þi pais, þou foule þing! . þou fli into helle —
Ne be þou so hardi . lengore þat tou duelle!
I bidde Jhesu Christ . þi mitte þat he felle.
Line 215
Ðou fal into helle, . so ston deet into welle!"
Upon þet oþer dai . a lute biforn non
Olibrius heitte þe mai . ut of prisun don.
Ðe sergaunz were snelle . ant broutten hire son,
Wid þe rode on hire honde . þat Christ was on idon.
Line 220
Ðo spec Olibrius — . i-wis, e was ful wroet —
Ant saide to is sergaunz: . "wonder, wou ho goet.
"Lef on me, Maregrete, . ant haue mete ant cloet!
Do after me ant be my wif, . ne be þe þi lif so loet!"
"Awaried worþe þine godes . þat tou leuest inne —
Line 225
Ho weren yare awaried, . ant al ful of sunne;
Ho beet al of helle, . of satanas cunne.
Wene þou wenest best to liue, . to him a wollet þe winne.
Ac do nou wel ant lef on him . þat made þe to mon:
Fader ant sone ant holi gost, . þat þis world bigon,
Line 230
Ant let þe folewen . in holi fonston,
Ase Jhesu Christ was ymself . y þe flem Jurdan!"
