Meidan Maregrete, . britt so eny leme,
Iblesset wort þou to-dai . of al þat i con neme.
Ðe heie king of heuene . ful wel hauet herde þi steuene:
He þe sende þis crois, . þine fon to aferene." [H. fou st. fon.]
"Blessed be Jhesu Christ . þat me bote sende,
Line 165
Ant is holi angel, . to me þat he wende!
Fader ant sone ant holi gost, . þat alle us mai amende,
Ne lete neuer to-dai . myne herte wende!"
Meidan Maregrete . lokede hire bi-side:.
Ho sei a foul dragun . ine þe hurne glide,
Line 170
Berninde ase fur, . ant goninde ful wide;
He wert ase grene . so gres ine someres tide. [H ho st. he.]
Ðe fur flei of is mouþe . so leie of brenston.
Ho fel to þen erþe . ant quakede uich bon.
He nom ir in is mouþe . ant swalen hire anon. [ant st. to?]
Line 175
He barst a two peces, . felawe nauede he non.
Meidan Maregrete . upon þe dragun stod;
Bliþe was ir herte, . ioiful was ir mod:
Sclawen was þe dragun . þoru þe uertu of þe rod.
"Blessed be Jhesu Christ! . is mitten is so god."
Line 180
Meidan Maregret . þe dragun ede fro:
Ho sei anoþer deuel . þer-inne þo.
E heuede eien on is cleu . ant eken on is to—
Ne mitte foulore þinȝ . neuer (on) erþe go. [on fehlt vor erþe.]
Ho wende to þe loþe þing, . þe rode in hire hond,
Line 185
Ðoru þe mitte of Jhesu Christ . wid her wempel ho hin bond,
Ho toc him bi þe toppe, . abouten ho him swong,
Sette ir fot in is necke . ant to þen erþe wrong.
"Sai me nouþe wat tou art, . þou foule loþe þinȝ,
Upon wam þou bileuest . ant wo is þi kinȝ, [H. wo, C. wa.]
Line 190
Ant wo þe hider sende . to maken stourbing;
Tel me nou swiþe, . ant into helle spring!"
"Leuedi, for þe rode loue . þat is i þine honde,
Hef up þi fot a littel . þat ine myn necke stond!
Muchel ic habbe iwalken . bi water ant bi londe,
Line 195
Nas ic neuer ibounden . in so harde bonde.
