Salamon þe wise, | til he was oliue,
He dede ous in a bras fat | and delued ous vnder cliue.
Line 250
When he was oliue farn, | þai lete ous out driue,
Þe men out of Babiloine, | þe bras fat þai gun riue:
Þai wend to finde gold anouȝ | and lete ous alle go.
Sum wer swifter þan þe winde, | and sum þan þe ro.
Ȝete þer er in erþe | ten þousend and mo.
Line 255
Al þat trowe on Jhesu Crist | þai fond at wirche ful wo."
"Be stille, þou foule gost, | and decende into helle!
Be þou neuer so hardi | more man to quelle!
Y pray mi lord Jhesu Crist | þi pouste þat he felle."
He sank into erþe, | so ston in drauȝt-welle.
Line 260
On þat oþer day | after it was non, [Ms. is st. it.]
Olibrious comand | sche were of prisoun don.
Þe holy gost of heuen | he com to hir ful sone,
Þe rode token in hir hond | þat Crist was on don.
Þan it spac Olibrious — | Crist ȝiue him iuel dede! —:
Line 265
"Maiden Mergrete, he seyd, | hastow taken þi rede?
Wiltow be mi leman, | y finde þe cloþ and mete.
Trowe on mi godes anon, | or þi liif þou schalt forlete."
"Þine godes þai be doumbe | þat þou trouwest inne;
Þai er ich a dele | ful of sake and sinne;
Line 270
Þai er comen out of helle, | of Satanas kinne.
Þan þou wenes best to liue, | Þou schalt to helle winne. [þan = when.]
Y rede þou leue on Jhesu Crist | þat al þe world haþ wrouȝt,
Fader and sone and holy gost, | þat al þing made of nouȝt,
And wiþ his swete blod | he haþ ous alle bouȝt.
Line 275
Leue on him and be cristen man, | and lete þi wicke þouȝt!"
Þan spac Olibrious, | þer he sat on his des:
"Ichil bileue on mi godes | þat y formast ches;
For min godes be trewe, | and þine er fals and les —
While þou leuest on him, | þou schalt haue no pes."
Line 280
Maiden Mergrete | answerd, þer sche stode:
"Yblisced be Jhesu Crist, | his help it is ful gode.
Y no doute þe noþing, | be þou neuer so wode,
Mi trust is al on Jhesu Crist | þat for ous schadde his blod."
Olibrious on Mergrete | anon he gan to grenne,
Line 285
And seyd to his turmentours: | "a pine y wil ȝou kenne.
Takeþ and walleþ oyle | and lete opon hir renne!
And bot þe wiche turn hir mode, | to deþ ȝe schul hir brenne."
