The Middle English charters of Christ ...

seel; is þe schap of oure lord ihesu crist hanginge for oure synne on þe cros. as we moun se bi þe ymage of þe crucifix | he haþ his heed bowid don; redi to kisse alle þilke þat verili turnen to him he haþ hise armes spred abrood; redi to biclippe hem | he is nailed faste foot & honde to þe crosse; for he wole duelle wiþ [folio 74] hem & neuere wende awey fro man; but if man forsake him first þorouȝ synne | he haþ al his bodi spred abrood: to ȝeue himself hoolly to vs cleuynge to him | vtterli he haþ his side opened; & his herte cloue for or oure sake | so þat wiþoute lettinge we moun crepe in to cristis herte & reste þere þorouȝ stidfast bileue & herti loue | þis chartre may not fiyr brenne ne watir drenche; neiþir þeef robbe neiþir ony crea|ture distroie | for þis scripture þe fadir of heuene haaþ halewid eiþir maad stidfast | & sente it into þe world; þe whiche scrip|ture mai not be vndo as þe gospel witnessiþ | þis scripture is oure lord Ihesu crist; chartre & bulle of oure eritage of heuene | locke not þis chartre in þi coffre; but sette it eiþir write it in þin herte | & alle þe creatures in heuene neiþir in erþe neiþir in helle moun not robbe it neiþir bireue it fro þe. but if þou wolt þi self assentinge to synne | & if þou kepist weel þis chartre in þe coffre of þin herte wiþ good liuynge & deuote loue lastingli to þin ende | as tristeli & treuli as he is trewe [folio 74b] god; þoroouȝ vertu of hise chartre þou schalt haue þin eritage of blisse duringe wiþouten ende. . . . .