[folio 72] A good tretys of a notable chartour of pardoun of oure lorde Ihesu crist &c. [in a different and later hand].
Euery wise man þat cleymeþ his eritage. eiþir askeþ gret pardoun: kepiþ bisili & haþ ofte mynde vpon þe chartre of his calenge | & þerfore eche man lerne to liue vertuously: & kepe & haue mynde vppon þe chartre of heuene blisse | & stodie stidfastli þe witte of þis bille: for þe pardoun þerof schal dure wiþouten ende | vndirstonde wel þat þe chartre of his eritage, & þe bulle of his euerlastinge pardoun: is oure lord ihesu crist. writen wiþ al þe myȝt & vertu of god | þe parchemyn of þis heuenli chartre. is neiþir of scheep ne of calf: but it is þe bodi & þe blessid skyn of oure lord ihesu loomb þat neuere was spot|tid wiþ wem of synne | & was þere neuere skyn of scheep neiþir of calfe so sore & so hard streined on þe teynture eiþir harewe of eny parchemyn makere as was þe blessid bodi and skyn [folio 72b] of oure lord ihesu crist. for oure loue streined & drawen vppon þe iebat of þe cros herde neuer man fro þe biginnyng of þe world til to now. neþir schal hens to domesdai: þat euere writere wroot vppon schepis skin eiþir on calues wiþ so hard & hidouse pennes. so bittirli so sore & so depe as writen þe cursid Iewis vppon þe blessid bodi & swete skin of oure lord ihesu crist. wiþ harde nailes. scharpe spere & sore prickinge þornes instide of here pennes | thei writen so sore & so depe. þat þei perciden hise hondes & feet wiþ harde nailes: þei openeden his herte wiþ a scharpe spere | þei perssiden vppon his heed a corowne of
