MAGD. COLL. OXF. ST. PETER IN THE EAST 18e (VERSO)
Ihesu kyng of heuen ant helle
man & woman y kil þe telle
What loue y haue do to þe
loke what loue þou hast do to me
Of alle ioye þou were out-pult
Line 5
with treson & with-oute gylt
Pore þou were dryue a-way
as a best þat goþ on stray
Fro my ryche y come a-doune
to seche þe fro toun to toun
Line 10
Myn heritage þat is so fre
in þy mischef to ȝyue hit þe
whenne þis ȝyft ȝyue þe y sholde
y dyde as þe lawe wolde
To a mayde y ordeynyd me
Line 15
for no chalenge shulde be
Wel worþily he kepte þe ant me
til y my tyme wolde see
Fourty wokes and fourty daies
to fulfille þe riȝt lawes
Line 20
Þe mayde was triwe hende & free
he resceyued [Transcript resteyned.] boþe [The first letter has been altered in writing.] me & þe
Me þy manhede & þy grace
Þus cam sesing furst a place
Whan þis sesyng was y-do
Line 25
ful grete enuy hadde þo þy foo
Þo belzebub & sathanas
hadde grete wonder wh[i] [The last letter is blurred but looks like o.] hit was
He fondit me with felonye
with pride couetyse & glotonye
Line 30
Wel he wiste y was a manne
but synne on me fonde he none
Hard he þretned me in hys þouȝt
Line 33
Þat þat sesyng shulde be dere bouȝt
He sent his seruantes with maistrie
Line 35
With wo & sorowe me to destrye
Wel he fonde hym gayned noȝt
anoþer þyng was in my þouȝt
More syker þe to make
aȝens þy foo ful of wrake
Line 40
Heuen & erþe in present
to make a chartre of feoffament
In suche a maner be-houyþ to be
Þat y most ȝyue my lyfe for þe
For þou art dede ant y am lif
Line 45
y most dye to ȝyue þe lif
Mony a way y haue go
in hungre & thirst thole & wo
Þritti wynter & mo þan too
er my charter were full doo
Line 50
No myȝt y [Transcript miȝty.] fynde no parchemyn
for to laste with-oute fyne
But as loue bad me doo
myn owne skyn y toke þer-too
To gete me frendys y gaf good mede
Line 55
so doþ þe pore þat haue more nede
On a þorsday a souper y made
frend & fo to make glade
With mete ant drynke to soulys fode
With holy wordes my flesh & blode
Line 60
Þis y made for mankynde
My loue-dedys to haue in mynde
Line 62
Hoc facite in meam comemoraci|onem
