and þus it preieþ to God þat þis douȝter be quykened. And whan Crist entriþ to þe soule of þis maiden and moveþ wiþ his worchinge hond þe spirit of it, þan it riseþ to lyf and worchiþ by grace. And here men noten, how a ligginge man, þat shulde be areisid up, shulde bede his hond and þe reiser shulde take it, and so bi strengþe of hem boþe shulde þe man rise. Ech man in synne liþ [liip, B.] at þe erþe, and God helpiþ many men to rise up to grace, and if þei wirchen wiþ God to þis werke of lyfe, God wole make hem stonde, and comfort hem to wirche. Þis woman þat was heelid, as Crist wente to þis hous, of þe flix of blood þat she hadde twelve ȝeere, is every persone of man combrid wiþ synne, where it be symple persone or gedrid of many; and þes twelve ȝere bitokenen double age of two kyndis of man bi which he dwelliþ in synne. But man may spende al þat he haþ aboute oþir fisicians [So in B; fecicisians, A; fesicianes, C.] and gete him absolucions, ȝhe after þe daie of dome, and many indulgensis, wiþ lettris of fraternite, þat biho|tiþ [heten, B; biheten, C.] him to come to hevene, as soone as he is deed, and ȝit mai þe flixe of blood rennen wiþ al þis, and he may be depper in synne wiþ al þes dispensis. And herefore mekenesse of Crist is a special medicine, þat a man þenke hou he is in þe last place beden of Crist to soupe wiþ him in hevene. And þus þis cloþing of Crist ben seintis þat he cloþid, and þe last of þis cloþing is þe last place þat men shulden repute hem inne bi mekenesse of herte, and doing awey þes presumpciouns comen þei þus bihinden, and Crist bi siche mekenesse ȝyveth hem grace to leve synne, and þis is beter þan medecynes þat fesicians sellen. And siche men ben confortid bi wordis of Crist, for Crist heliþ noone bodily but ȝif he hele hem of synne, and þus ech storye of myraclis of Crist mai be moralisid to a good witt, ne is it no perel to varie in siche wittis, so þat men varien not fro þe treuþe, ne fro good lore, for þe Holy Goost, autor of þes wordis, ordeyneþ men to have al sich wittis, and he ordeyneþ þis tixt to move hem herto. Hou shulde sich sense be error in man? But siche wordis axen good jugement, for many heretikis seyen þat þei han witt of God, and ȝit it mai be oon of þe fendis heresies.
Here men douten comonly whan men synnen dedely
