Select English works of John Wyclif; edited from original mss. by Thomas Arnold.

we shulden not strange from him, we shulden leeve þes ipocritis and sue þe lore of þis good maister, siþ he may not leve treuþe, ne faile in teching of truþe. And þus shulden men ben perfit, and flei the rote of falshede. And þes prelatis have of þere maistris comounly þis manere, þat þei can see a mot in hir bro|þer' eye, but a beem in þer owen iȝe þenke þei not oon. For þere witt is sett to spuyle and to accuse, and not for to helpe hem ne oþer men, and þerefore her coveitise blindiþ hem þus; but bi lore of Crist men shulden sei to hem, Ypocrite, cast first þe beeme out of þin owne eye and þan maist þou poke beter þe mot fro þi broþir.

Here may men see þat sugettis shulden blame prelatis whan þey seen opynly greet defautes in hem, as defaute of Goddis lawe in keeping and teeching; for þis is a beeme bi which þe fende bindeþ his hous and þei shulden knowe þes as þei shulden fele the lore þereof.

ÞE story of þis gospel telliþ good lore, how prelatis shulden teche folk under hem. Þe story is pleyn, how Crist stood by þe river of Genazereþ, and fisheris comen doun to waishe þerynne þer nettes; and Crist wente up into a boot þat was Symonis, and preiede him to move it a litel fro þe lond, and he sate and tauȝte the peple out of the boot. And whanne Crist ceesside to speke, he seide to Symoun, Lede þe boot into þe hey see, and late out your nettis to takyng of fishe. And Simoun answerynge seid to him, Comand|our, al þe nyȝt traveilinge token we nouȝt; but in þi word shal Y lose þe nett. And whan þei hadden done þis, þei token a plentenouse multitude of fishe, and þer nett was broken. But þei bekeneden to þer felowis þat weren in þe toþer boot, to come and helpe hem; and þei comen and filliden boþ botes of fishe, so þat wel nyȝ were þei boþe dreynt. And whanne Petre hadde seen þis wounder, he fell