þanne, þei seien, man brake his fast, etinge þe oost whanne it is sacrid, and þanne he shulde not take aftirward Goddis blood þat is sacrid in þe chalis. Lord! whi witen not þes foolis þat þer accidentis maken men drunken whanne þei taken hem above resoun, as Poul witnessiþ? And witt proveþ where þis man be excusid of gloterie, for he is drunken of an accident. And siþ taking of þis þing in mesure was no synne in Cristis tyme, what vertue haþ mannis statute to make þis be synne more þan þanne? Þes founed wordis fordone Cristis fredom, and bileve þat men shulden have. Ȝif þis be no synne to God, it is no synne for to charge to eeten in mesure bifore þe masse, and after to synge and use.
Aftirward we shulden wite, how Christ reprovede unbileve and hardnes of apostlis hertis, þat weren bifore, and þanne weren taken awei, for þei hadden not sorewe ynowȝ for þese errours þat þei weren inne. And þei shulden note þe wordis of Crist þat he spak þat tyme to hem. And þis is anoþer note, how Crist bad hem þanne go and preche þe gospel freli to alle manere men. And wo be to hem þat letten þis, for jurisdic|cioun or oþer cause; as wo is to hem þat leven þis, and prechen dremys, fablis, and gabbingis. And it is not ynow to have nakid bileeve, but men moten have charite, þat shal fourme oþere vertues. And þis baptisiþ men wiþ baptym of þe Holi Goost.
But ȝit men douten of þes wordis þat Crist spekiþ aftir. It semeþ þat alle men þat bileven moten nede have þes fyve signes; and siþ noon of us haþ hem, noon of us haþ bileve. Here men seien comunli, þat seintis at þe first tyme hadden alle þes fyve signes betere þan we have now. But trewe men have in a manere alle þes signes now. For whanne þei de|lyveren hem of synnes, þei casten out fendis in þe name of Crist. And þei speken wiþ newe tunges, for alle þingis þat men done in grace be newe bi titil of grace. And Crist seiþ, in Apocalips [Is the reference to Apoc. xii. 9?] , þei taken awei addris þat þei have of þer fleish; for þer will is awei to displese God bi þer lust. And dedli drynke, ȝif þei taken it, or oþer þing þat comeþ to hem, anoieþ
