þat Y am mylde and meke of herte, and sue ȝe ȝoure Fadir in þes two, and þanne, shal ȝe finde reste to ȝoure soulis, in ȝoure traveil. For my ȝok is swete, and my charge is liȝt. And þes wordis of Crist, to conforte religiouse men, ben betere þan alle þes newe reulis þat ben cloutid to Cristis wordis; for, in what staat þat þou be in Cristis religioun, lerne wel þe lessoun of myldenes and mekenes of Crist, how he kepte him in al his lyf, in what troublyng þat he was inne. And ȝif þou be on Goddis half, þou shalt lyve mekeli aftir Crist.
ÞE GOSPEL OURE LADY DAY IN LENTE.
[SERMON CII.]
Missus est Angelus Gabriel a Deo.—LUYK. i. [26.]
ÞIS gospel telliþ to þe Chirche how þe aungel grette oure Ladi, and how she, bi hir mekenesse, ablide hir to conseyve Crist. And þis þridde feste of oure Ladi is a wondir hiȝe feste, for in þis was Crist maad man, and Crist passiþ alle oþer seintis. And so men seien comunli, þat oure Ladi hadde fyve joies. Þe firste was at þis tyme whanne she conceyvede Crist bi mekenes. þe secounde was whanne she bare Crist wiþouten peyne at Criste|masse; þe þridde was whanne it was shewid to hir þat Crist was risen fro deeþ to lyve; þe ferþe was whanne she saw hir sone stie in to hevene; and þe fifþe joie was whanne she was deed and take to blisse. And to þes fyve joies ben answerynge fyve vertues þat we mai have; and ȝif we wolen worshipe þis Ladi, holde we þes vertues wel. Þes fyve vertues ben in þis ordre: mekenesse and chastite, bileve and hope, and charite; and ȝif we kepen hem we plesen God. And siþ Crist and his modir moten nedis be of oo wille, þus shal we plese to Marie, þe which is Goddis modir.
Luk telliþ how, Gabriel was sent fro God to grete Marie. And, for sum men ben clepid Gabriel, þerfore þe gospel specifieþ þat, þe aungel Gabriel was sent fro God to Nazareth, þat was, a citee of Galilee, in which citee oure Ladi dwelte. And þis maiden was
