to weiȝte. Þe firste helþe shulde stonde in a mannis membris, and in his compleccioun, in humouris, and in elementis, which in suche acord ben knettid to gider, þat noon of þese mai be contrarie to anoþer; and siþ no man is siik but [om. A; perperam.] bi sich con|trarite, þis man þat þei speken of mai nevere more be siik. But hoolnesse of weiȝte mai falle to a man; and þat is nevere more wiþouten greet sykenesse, al ȝif it be hid by governynge of fisike. He is hool in weiȝte þat haþ of ech element as moche as he mai worche, wiþ dedes þat fallen to men, and on þis wise moun þei maken men hool. But blessid be oure mesure, þat Crist puttiþ in charite, for þat is moost rial and ground of al oþer; and no man mai be saaf but if he knowe þis mesure, and þis mesure helpe him to gendre in him charite; and þus shulden men in dede practise in þis science, for veyn speche þerof pro|fitiþ not, but harmeþ. Þis love was shewid in Crist, whanne he putte his lyf for love of his breþeren, and brouȝte summe out of helle, and savede oþer þerfro; and herfore seiþ Crist, for practisinge of þis love and ensaumple þerof, þat þei shulden love togidere as he haþ loved hem [So E; no italics in A.] ; and þanne þei ben al hool.
And herfore moten we nedis lerne þe bileve of þe passioun of Crist, and of his deþ suwynge, siþ after forme of þis love we shulden love togidere; and wantinge of þis love is cause of ech synne and of ech harm þat falliþ in þe Chirche; and þerfore men shulden enforce hem more to lerne þis love. And her|fore traveilide Poul in techinge of charite, and telde sixteen condiciouns, þat shulden folowe it. And as many men seien þat þei ben hool in bodi, many men seien þat þei ben in charite, and loven God over al þing, and her neiȝbore as hem silf, but ȝit þei gabben opynli, as her lyf shewiþ. Þis lore þat Cristis scole axiþ loveþ none gabbingis, but þat þei do in dede as her mouþ confessiþ. And, for Crist haþ teeld þat þis hiȝe charite techiþ a man to putte his lyf for love of hise frendis, and þis love is oonli in persone of Crist, he telliþ how hise apostlis and oþer men ben hise frendis. Ȝe ben þanne, seiþ Crist, frendis of me þat han þis love, if ȝe done sadli þe þingis þat I bidde ȝou. And so it is of oþer men þat doen as þese apostlis, for þei ben
