þat God is moost lord of al oþer, and no man may do synne, but ȝif he synne aȝens him, and no synne may be forȝovun but ȝif God first forȝyve it. And so it is propre to God to forȝyve þus offence, and ȝif a man forȝyve siche synne, þat is bi power of viker; and siche power haþ he not, but ȝif God shewe it him. For ellis myȝte he graunte pardoun for longe after þe day of dome to men þat God wole have dampnyd, for a newe founde praier, and heien it for mannis love more þan þe Pater Noster: as men seien þat a pope haþ grauntid two þousand ȝeer to ech man þat is contrite and confessid of his synne, þat seiþ þis orisoun 'Domine Jesu Christe' bitwene þe sacringe of þe masse and þe þridde Agnus Dei. And þan it were ydil to traveile for ony pardoun, siþ a man myȝte at home gete him fourty þousand ȝeer bi noone. And so þat man þat shal be dampned, þat is confessid and contrite, and seiþ þus ofte þis praier, shulde have many þousand ȝeer in helle after þe daie of dome. Triste we to þe old bileve þat Crist assoiliþ as he wole, and þis forme is hid to men as oþer treuþis þat God wole hide.
Thomas oon of þe twelve þat is clepid Didimus was not wiþ þes ten whan Jesus came and dide þus; and oþer disciplis tolden him hou þat þei saien þe Lord. But he seide unto hem, But ȝif Y see in his hondis picching [pitchyng, E.] of þe naillis, and putt my fynger in þe place þat Crist was ynaillid in, and put my hond in his syde where he was persid wiþ þe spere, Y shal nevere trowen þat oure Jesus is rysen. And on þe Sonday nexte after, weren þes disciplis inne and Thomas wiþ hem; and Crist shewide him as bifore. For he came whan þe ȝatis weren closid and stood amyddis, and saide, as he saide bifore, Pees be to you. And after he seide to Thomas, þat he sente after to Inde, Putt in here þi finger and se my hondis and putt hidir þin hond and putt in to my side, and wole þou not be untrewful but trewe in bileve. Thomas answeride and seide to Crist, My Lord and my God. And Jesus seide to him þan, For þou say me þus, Thomas, þou bilevidst in me; but blessid ben þo þat saien not þis, and trowen as þou doist. Many oþer signes dide Crist in siȝt of his disciplis, but þes few ben writun in þis book for þis ende, þat ȝe bileve þat Jesus is Goddis sone, and þat ȝe for þis bileve have blisse in his name. Amen.
