Select English works of John Wyclif; edited from original mss. by Thomas Arnold.

wille þat men diden skilfulli to us, we shulden do to hem. But what man wolde by skile be þus chastisid of his broþer, for mannis obedience þat he doutiþ to be a fend? Crist axide not siche obedience to be done to him, but who so wolde wiþ good wille obeishe to him wiþouten ȝifte, Crist wolde take hem to grace; but þes men taken to tirantrie. But, as þe sixte sermoun seiþ [See page 16, supra.] , scribis and pharisees seiden þat man-sleynge was forfendid, but neiþer yre ne yvel word. But Crist diffineþ þus, þat who so is wroþ to his broþer is worþi of jugement, to be dampnyd in helle; and who so wiþ þis ire spekeþ wordis of scorne, he is worþi to be dampned bi counseile of þe Trinite. And whoso wiþ þis wraþe spekiþ folily wordis of sclaundre, he is worþi to be punishid wiþ þe fier of helle. Myche more ȝif preestis now wiþouten cause of bileve sleen [So B and E; A has slen.] many þousand men, þei ben worþi to be dampnyd—Croiserye ne assoilinge feyned now of prelatis, shal not at þe daie of dome reverse Cristis sentens. And take we hede to þes þree þat Crist chargiþ bi ordre: wraþe, and scorneful speche, and foli speche of sclaundre; and to þes þree Crist shapiþ jugement, conseil, and þe fier of helle. It is hard to be dampned bi jugement of Cristis manhede, but it is hardere to be dampnyd bi conseile of þe Trinite, but it is hardest to be putt bi þes to þe fier of helle. Lord! ȝif God punishe þus wille and mannis wordis, myche more shal he punishe wille, word, and wickide dede.

ÞIS gospel telliþ how Jesus bi a myracle and witty wordis enformeþ his Chirche to flee synne and perel þerof. Þe storye telliþ how Jesus was castynge out a fend of a man and þis fend was doumbe. For he made þis man dombe. And whan he