Select English works of John Wyclif; edited from original mss. by Thomas Arnold.

þis lyf shulde smelle Crist, and sue hym. And riȝt as þe mone is principale planete after þe sunne, so Cristis manhede is principal after his Godhede. And as fadris of þe olde lawe smelliden Crist in þer dedes, so myche more we shulden now smelle Crist in alle oure dedes, and þanne we shulden sue þis moone, and eende sikirly þis weie. For þis smelle is Crist, clepid plantinge of rose in Jerico, and his weye is smellinge of a ful felde þat God hadde blessid, and þis smel hadde Jacob and oþer fadris þat trowiden in Crist. Þis blynde man is mankynde þat was blyndid bi synne, and beggide boþe of God and man, for it was nedid herto. Ech man mote begge of God and axe of him his ech daies breed, and begge goostly werkis of mercy of his breþeren, for þei ben slowe to do þes werkes as þei ben holden to do bi þe lawe of God. And þes men sitten bi þe weye þat ben temptid of þe fend, þat takiþ of hem Goddis word, and makiþ hem pore in bileve. Þes men heeren þat Jesus passid bi þis wey in many membris, and þei cryen fast on him to helpe hem in þis nede; but Jesus biddiþ siche blynde men to be brouȝt to him in þer bileve; and þei axen first of Jesus, to see wel in riȝt bileve. And men þat ben worþi herto, seen anoon in þer bileve, suyinge Crist and lovynge God, for þan þei witen how þei shulden lyve. But þes men þat comen bifore blamen faste þis blynde man and letten him for to crye and axe helpe þus of Crist. For many comen not wiþ Jesus in þer lore þat þei techen, but comen bifore him, and seien þat þei ben betere þan he, and suen him not in þer lyf, but holden a lyf þat þei have founden. And þes men þat smellen Crist in his lyf, and his lawe, þei clepen hem ypocritis, and maken hem ceese to speke of Crist. But þes men þat saveren God bi suche wordis, speken more, and preien Crist to helpe hem to þe tyme þat þei ben dede, and ever þese [So in B; þes, C; þis, A.] men smellen more of Jesus Crist, þat is þis rose. For good þing comfortiþ men, ȝhe more whan it is more defoulid. And þus þei seen and suen Crist to hevenly Jerusalem, and loven him in word and dede from þe tyme þat þei have þis siȝt.