reprove siche ful harde. ffor þus dide crist oure alþere maystir reprouynge þes pharisees, and so he dide to peple [Matt. xxiii.] clepynge him sathanas, and so charite chacchiþ men to þis iust jugement. ffor goddis lawe techiþ vs to don to oþere [Matt. vii. [12.]] men as we schulden willen þat þei diden to vs. But who led bi resoun putt in greet perel wolde noȝt be glaad to haue helpe þere of? But siþe ech man by synne is in an huge perel, he schulde be glaad of eche þing þat warneþ him of his perelle, ȝif it be neuere so lowe & werse þan man in kynde. For ellis men [weren probably omitted.] in obedient as þe firste apostata. Wel I rede in goddis lawe þat god was obedient unto voys of man as to his owne [Josh x. [12.]] instrument. And so siþe ech creature þat telliþ a man a treuþe is instrument of god to schewe him þis truþe, it were oon to dispise þis instrument in þis and to dispise þe truþe of þe lord þat he schewiþ. But he were oute of resoun þat were smyten in feueris or ellis in a frenesye or ony oþer siknesse þat wolde noȝt take his medicine or reule of anoþer man, al ȝif it were displesynge to him for a tyme. Thus meke men & trewe men blamen noȝt þe creature þat telliþ hem a truþe in name of god, siþe þe lord moeueþ hem for profyt [page 193b] of men to tellen hem goddis wille, in him schulde þei heren. and so ȝif we can se clerkis schulde wiþ ioye suffre temporal lord|schipis be taken awey from hem. For wel we wyten þat þis were noȝt aȝens goddis lawe ne hyndrid hem noȝt to gete hiȝe setis in heuene; but raþere disposide hem to come to myche blisse and þus schulde ech man willen as god him silf biddiþ hem.
And so take heede what god biddiþ þee do & do þat and noon oþer, for al oþere is synne. & loke to alle þingis þat comen to þee to suffre and suffre it mekely, siþ god nediþ þee þerto & sendiþ it for þe beste, al ȝif þou kanst noȝt se it; as a child is ofte betyn for his owne profyte and ȝit he grucchiþ þer-aȝens, for he seeþ noȝt þe resoun. and þis moueþ many men mekely to suffre whateuere comeþ to hem, for so biddiþ charite.
