The English works of Wyclif hitherto unprinted.Edited by F. D. Matthew.

degrees of plente of grace. þe leste of þis plente was in steuene, þe mydil in oure lady, but þe most in oure lord ihū crist. ¶ God þe trinyte is wiþ eche creature bi myȝt, wisdom & goodnesse to kepe it, for ellis it schulde turne to noȝt; but god is wiþ goode men of vertuous lif bi grace to approue & accepte here doyngis & helpe hem þer-inne, to rewarde hem in blisse þerfore, & dwelliþ in here soulis as his owen temple, & makiþ hem ioifully dwelle in his seruyce & suffre [suffriþ X.] gladly alle dispitis & persecucion for his name; but god is in angelis & seyntis in heuene bi clier schewynge of his godhed to hem & makynge hem to knowe alle þingis & haue alle þat euere þei desiren wiþ-outen ony anoye or peyne. ¶ Blissed be þou among wymmen; þat is more þan ony oþer womman, for noon oþer was so sad in bileue ne so meke ne so chast ne so goode in alle manere holynesse & namely in brennynge charite. ȝif þou wilt haue part of maries blisse & goddis blissynge sue marie in þis holy lif & [in X.] namely in þes seuene, feiþ, hope, & charite, & mekenesse, chastite, sobirnesse, & brynnynge desir of riȝtwisnesse. And blissed be þe fruyt of þi womb: þat is ihū, for bi his mercy & grace comeþ alle goodnesse, & namely bi his trewe techynge & wilful deþ & endeles myȝt, be whiche he schal reise alle men at domes day & ȝif blisse of heuene in bodi & soule to þo þat ende in perfit charite. god ȝeue vs grace to þenke on cristis mercy & riȝtwisnesse & maries sadnesse in bileue, & mekenesse to make ende in perfit charite. Amen.