Chapter IV
THE LADY OF LANGO
OF SEYNT JOℏN THE EUUANGELIST & OF YPOCRAS DOUGℏTER TRANSFORMED FROM A WOMMAN TO A DRAGOUN.
AND aƚƚ be it þat þeise thinges touchen not to .o. way neuertheles þei touchen to þat þat I haue hight ȝou to schewe ȝou a partie of custumes & maneres & dyuersitees of contrees. And for this is the firste contree þat is discordant in feyth & in beleeue & varieth from oure feyth on this half the see, þerefore I haue sett it here, þat ȝee may knowe the dyuersitee þat is betwene oure feyth & theires. For many men han gret likyng to here speke of straunge thinges of dyuerse contreyes. [folio 10a] Now returne I aȝen for to teche ȝou the way from Constantynoble to Ierusalem. He þat wol þorgℏ Turkye he goth toward the cytee of Nike & passeth þorgh the ȝate of Chieuetout & aƚƚ weys men seen before hem the hiƚƚ of Chieuetout þat is right high & it is a myle & an half from Nike. And whoso wil go be watre be the brace of seynt George & by the see where seynt Nicholas lyetℏ & toward many oþer places First men gotℏ to an jle þat is clept Sylo. In þat Ile groweth Mastyk on smale trees & out of hem cometh gomme as it were of plombtrees or of cherietrees.