"Item, quod ecclesia vniuersalis potest errare in hiis que sunt fidei.
"Item, quod non est de necessitate salutis credere et tenere illud quod consilium generale et vniuersalis ecclesia statuit, approbat, seu determinat in fauorem fidei et ad salutem animarum, est ab vniuersis Christi fidelibus approbandum, credendum et tenendum.
"Wherefore I, myserable synner, whiche here before long tyme haue walked in derkenesse, and now by the mercy and infynyte goodnes of God reduced in to the ryghte wey and lyghte of trouthe, and consideryng myself greuously haue synned and wyckedly haue enformed and enfect the peple of God, retorne and come ayene to the vnyte of our moder holy churche; and alle heresyes and errours wryten and conteyned in my seyde bookes, workes and wrytyng, here solemply and openly reuoke and renounce, whiche heresyes and errours, and alle other spices of heresyes, I haue before thys tyme before the moste reuerend fader in God and my good lord of [folio 194a] Caunterbury, in dyuers and lawfulle forme iudicially abiured; sub|myttyng myself, beyng thanne and also nowe at this tyme verrey contryte and penytent synner, to the correccioun of the churche and of my sayde lorde of Caunterbury,
"And ouer thys, exhortyng and requiring in the name and vertew of Almyghtye God, in the saluacioun of youre soules and of myne, that no man hereafter yeue feythe and credence to my seyde perny|cyous doctrynes, heresyes and errours, neyther my sayde bookes kepe, holde or rede in any wyse; but that they alle suche bokes, workes and wrytyng, suspect of heresyes, delyuer in alle goodly haste vnto my saide lorde of Caunterbury or to his commyssioners and deputees, in eschewyng of meny inconuenientys and grete peryles of soules, the whiche elles myghte be cause of the contrary. And ouer this declaracoun of my conuersion and repentaunce I here openly assent, that my seyde bookes, werkes and wrytyng, for declaracioun and cause aboue rehersed be deput vn to the fyre, and openly brende in ensample and terrour of alle other," &c.
