An English chronicle of the reigns of Richard II, Henry IV, Henry V, and Henry VI written before the year 1471; with an appendix, containing the 18th and 19th years of Richard II and the Parliament at Bury St. Edmund's, 25th Henry VI and supplementary additions from the Cotton. ms. chronicle called "Eulogium." Edited by John Silvester Davies.

in Londoun, and there offre it vp. And the Friday next she shold go in lik wise fro Quenehide berying a tapir of the same weighte vnto saint Migheleȝ in Cornhulle, and there offre it vp. The whiche penaunce she fulfillid and dede righte mekely, so that the more part of the peple hadde on hir gret compassioun.

And aftir this she was committid ayen to the warde of ser Thomas Stanley, wherynne she was al her lif aftir, hauyng yeerli C marc., assigned to hir for hir fyndyng and costis; whooȝ pride, fals couetise and lecherie were cause of her confusioun. Othir thyngis myghte [folio 183b] be writen of this dame Alienore, the whiche atte reuerence of nature and of wommanhood shul not be reherced.

And the Satirday the xviij day of Nouembir next sewyng, maister Roger Boltyngbroke at Guyldehalle at Londoun befor the said lordis and justiceȝ was arreymed of the forsaid articleȝ of tresoun ayens the kyngis persone, and therof be xij men of Londoun he was founde gilty. Wherfore be the iugement of ser Johan Hody that tyme chief justice of the kyngis bench, he was drawe fro the tour of Londoun vnto Tyburne; and there he was hanged and leet doun half alive, and his bowellis take out and brent, and his hed smyte of and set on London brigge, and his body quartrid and sent to certayn tounes of Englond, that is to saye, Oxenford, Cambrigge, York and Hereforde. And whanne the said maister Roger sholde die, he confessid that he was nevir gilty of eny treson ayens the kyngis persone; but he pre|sumed to fer in his konnyng, as he sayde, wherof he cride God mercy; and the justice that yaf on him iugement livid not longe aftir.

The xxj yeer of king Harri, saint Georges feste was holde at Westmynstre, and there ser Johan Beaufort erl of Somerset was maad duke of Somerset.

The xxij yeer of kynge Harri, Johan erlle of Huntyngdoun at Wyndesore was made duke of Excestre.

And this same yeer deide the forsaid Johan Beaufort duke of Somerset, the vj kalendes of May, at Wymborne mynstre in the counte of Dorset, and there he is buried.