An English chronicle of the reigns of Richard II, Henry IV, Henry V, and Henry VI written before the year 1471; with an appendix, containing the 18th and 19th years of Richard II and the Parliament at Bury St. Edmund's, 25th Henry VI and supplementary additions from the Cotton. ms. chronicle called "Eulogium." Edited by John Silvester Davies.

enfectid thi court and thi reme." Thanne saide the duke, "No more, ye haue said ynoughe." The kyng wist not what he sholde say, but yeld him vnto the duke and saide he wolde resigne and renounce his righte; and thanne he was lad to the tour of Londoun, and there [[Sept. 1st.]] ykept in strong hold.

And aftirward in the vigili of saint Mighelle, were sent vnto him [[Sept. 28th.]] bishoppis, erlis, barons, knyȝtis, and notarieȝ, forto enquire and wite of him, if he wolde resigne as he hadde promised. First he said Nay, and thanne thay saide unto him that he moste nedis resigne withoute eny condicioun, and delyuerid him a cedule conteynyng the fourme of his resignacioun; and he redde it in presence of the forsaid duke and of meny othir lordis and a gret multitude of peple; wherof the tenour was this: "I, Richard kyng of Englond, re|nounce [Nota resigna|cionem Regis Ricardi.] and resigne alle the right that I haue in the croune of Eng|lond with thappurtenaunceȝ; that is to say, in the remeȝ of Englond and ffraunce, Yrlond and Scotland, and in the duchieȝ of Guyenne and of Normandie, and in the counte of Pountif, and in Walis, Caleis, and alle othir castellis and fortaliceȝ, that I haue now or may [folio 153b] haue aftirward be righte, beyonde the se and in this side, or in eny parti of thayme, for me and myne heyris for euermore." And wit|nessiȝ there present requirid notaries to make instrumentis vpon that resignacioun. And thanne kyng Richard confessid how he hadde gretly trespast ayens God and the reame, and that he was not worthi forto regne, for he wiste welle, he saide, that he loued nevir the peple, ne the peple him.

After this, the duke wente to Westmynstre, and there he was re| [[Sept. 29th.]] ceyued with procession solemly of bishoppis and monkis, and there was said a solenne masse of the Holi Gost; and aftir masse, he wente in to the halle and the kyngis swerd was bore befor him, and there he sat doun in his fader sete, and othir lordis sat there also, and moche peple standyng aboute; and there was red openli the forsaid resignacioun of king Richard, and was acceptid of alle peple. And thanne were there red and declared