And this same yeer fille a greet debaat and dissension, betuene the duke of Hereford and the duke of Norfolk, in this wise. The duke of Norfolk tolde priueli, as it hadde be vnder confessioun, and in gret counsel, to the duke of Hereforde, that the kyng hadde or| [Quod vis habere consilium nemi|ni dicas.] deyned to sle thaym bothe, because thay rood and aroos vith the duke of Gloucestre. The duke of Hereforde saide, "The king hath therof grauntid vs his pardoun." Thenne saide the duke of Norfolk, "The kyng is not trewe, as it hath wel apperid be the duke of Gloucestre and the erl of Arundel." The duke of Here|forde aftirward tolde this to his fader, the duke of Lancastre, and he tolde it to the king. And whanne the kyng examned the duke of Norfolk therof, he denyed it and forsook it; and the duke of Here|ford avowed it befor him, and him appelid of treson and of the deth of the duke of Gloucestre. Wherfore thay cast thair glovis and wagid bataille, and the day of thair bataille was assigned at Couentre; at whiche day the kyng withe his lordis was there present; and [folio 150b] whanne bothe dukis were redy in the place to do thair bataille, the kyng toke thair quarelle in to his handis, and exilid the duke of Hereforde for terme of x. yeer, and the duke of Norfolk for euer|more: the whiche duke of Norfolk deide aftirward at Veniȝe. And the kyng grauntid to the duke of Hereforde forto haue and receyue yeerli a certayne pension of money out of Englond; but he forbad him and made him swere, that he sholde not speke with maister Thomas Arundelle; for the king dradde alwey his counsel and his wisdoum; wherfore, as yt was said, the kyng so stirid and prouoked ayens him the peple of the cuntre that he sholde passe be, that unnethe he scapid with his lif.
Ferthirmore the king and his counsel ordeyned blanc chartris, and made lordis spirituel and temporel and othir worthi men sette to thaym thair selis; and therto thay were most constreyned be the [Nota of the blanc chartris, etc.] Bisshoppis, as it was said; wherynne the king purposid aftirward, as men saide, to haue writen thise wordis—"Because that we befor
