An English chronicle of the reigns of Richard II, Henry IV, Henry V, and Henry VI written before the year 1471; with an appendix, containing the 18th and 19th years of Richard II and the Parliament at Bury St. Edmund's, 25th Henry VI and supplementary additions from the Cotton. ms. chronicle called "Eulogium." Edited by John Silvester Davies.

[fragment Bb] grauntid. But in the morow, he chaunged his purpos, and wente to the tour of Londoun; and the lordis cam with thair power in to saint Johannes feld, and sente for the mair of Londoun, and he ladde thaym in to Guyldehalle, and alle the Cite was vnto thaym frendly and wellwillid. Thanne sente the kyng for the lordis to come and speke with him in the tour, and thay saide the place was not sure, but out of the tour thay were redy to speke withe him. Tho comaunded the kyng the mair of Londoun, forto reise and arme the [folio 147a] Cite agayns thayme. "Sire," saide the mair, "God it forbede! thay bith your trew lige men, and frendis to the reme." The kyng was wrothe, and sente the duke of Yrlond with his lettris patentiȝ, and with his baner displaid, in to Chestreshire, forto brynge a power of Chesshiremen and othir. And the v. lordis beforsaide mette with him beside Oxenforde, with the kyngiȝ baner displaid; and anon as the duke wiste what thay were, he fledde, and rood ouer the Thamyse in to the yle of Shepeye, and fro thenneȝ he wente ouer se in to Almayne, and nevir cam agayne. And the lordis beheddid the chief knyght that was with the duke, and took fro thayme the kyngeȝ baner, and folde it gedir, and bettyn the Chesshiremen, and droof thaym hoom agayne, and seue . . . . .

maister Alisaunder Nevile, Archebisshoppe of York, fledde also ouer se, as befor ys saide, and cam neuer agayne.

Thanne thise v. lordis ordeyned a parlement at Westmynstre; and there, ser Robert Tresilian, a justice; Nicholl Brembre, knyghte and citeȝeyn of Londoun; ser Johan Salisbury, a knyghte of the kyngeȝ hous; and ser Simon of Beverley, a worthi knyghte of the garter, for whom the quene knelid befor the v. lordis to haue saued his lif, but she myght not be herd; ser John Beauchampe, knyȝt, stiward of the kyngis hous; ser Jameȝ Berners, and othir, were [folio 147b] iugid to be drawe and hanged: and ser Simon of Beuerley was be|heddid atte Tour hill. And this parlement endurid fro Candelmasse to midsomer.

And tho v. lordis were quyt before the justiceȝ of alle thyng that