And then sire Rycharde Sturry herde of the kynges oth, and [A.D. 1395.] anon he renounced and forsoke alle tho poyntes and articulis of Lollardy, and therto he was sworen upon a booke, the kyng beyng present.
And in that same ȝere, ther was a squyer of Staffordeschyre beryng the kynges levere, the hert of syluer, with a felow of his of Northfolke ycleped John Colby; the wheche too ymagened a patent vnder the kynges grete seele, that the relygious of Esex and of Northfolke, and alle the nonneryes of bothe contreyes, scholde schewe to hem ther wrytynge of ther mortysementes; the wheche seyde squyer and Colby vsed and hade vsed a grete whyle, or they were aspyed, in dyuerse places of the rewme, and gate be tho menes moche goode falsly: but at the laste bothe were taken, and brouȝt to London, but John Colby deyde in pryson, and the squyer aboode the kynges comyng home out of Irelonde.
And in this same ȝere, the kyng dede do brynge the body of sir Robert Veer into Englond, the wheche was erle off Oxford.
And in this same ȝere, there apered in Fraunce a crucifix with his blody woundes ouer the churche-steple of the towne of Landa|vencis, the beschope, the clergie, and mony of the comune peple beholdyng theron; and hit apered so the space of halffe an our.
In that same ȝere, a barbour, called a Moret, an hethen lorde, fauȝt aȝeyns the priour of seynt Jhones of Rodes, the wheche pryour hade at his gouernaunce and ledyng but iij. C. off Cristenmen at that tyme; but manly, by Godes helpe, they fouȝt with the Moret, and slowe of the paynemus that come with hym to batayle mo than fyfty Ml. And when the Moret syȝ that he myȝt not prevayle aȝeyne the Cristen at the batayle on the londe, he began an newe warre upon the see: but, be the helpe of God, he was put to the wurse, and withdrowe hym.
And in this same ȝere, the marchantes of Northfolke were robbed of xx. Ml. pownde be the queenes meyne of Denmarke, the wheche was an vndoyng to mony of the marchantes of Northfolke for euer|more afturwarde.
