An English chronicle of the reigns of Richard II, Henry IV, Henry V, and Henry VI written before the year 1471; with an appendix, containing the 18th and 19th years of Richard II and the Parliament at Bury St. Edmund's, 25th Henry VI and supplementary additions from the Cotton. ms. chronicle called "Eulogium." Edited by John Silvester Davies.

laste, thorow the withdrawyng of the Kentisshmen with thayre cap|teyne, called Lovelace, that was in the vaunt-warde,—the whych Lovelace fauored the Northe party, for as moche as he was take by the Northurnmen at Wakefeld whan the duk of York was slayne, and made to theym an othe for to saue his lyfe, that he wold neuer be agayns theym,—and also be vndysposycion of the peple of the kynges syde, that wold nat be guyded ne gouerned by theyre cap|teyns, kyng Harryes part loste the feeld. The lordes that were wyth [folio 213a] the kyng seyng thus, withdrowe theym, and went theyre wey.

Whan the kyng sawe his peple dysparbeled and the feeld broke, he went to his quene Margarete that came wyth the Northurmen, and hyr sone Edward; for thay of the North sayde that thay came for to restore the kyng to the quene his wyfe, and for to delyuer hym owte of pryson; forasmeche as seth the batayle of Northampton he had be vnder the rewle and gouernaunce of the erles of Warre|wyk and Salesbury, and of other.

The sayde erle of Warrewyk dressed hym toward the erle of Marche, commyng toward London owte of Wales, fro the dyscom|fyture of the erles of Penbroke and Wylshyre. The lorde Bone|vyle that came wyth kyng Harry wolde haue withdrawe hym, as other lordes ded, and saued hymself fro his enemyes, but the kyng assured hym that he shuld haue no bodyly harme; natheles nat|wythstandyng that sewrte, at instaunce of the quene, the duk of Exetre, and therlle of Deuonshyre, by iugement of hym that was called the Prince, a chylde, he was beheded at Seynt Albons, and with hym a worthy knyghte of Kent called ser Thomas Kyryelle. Ser Johan Nevyle, kyng Harryes chamburlayne, brother to the erle of Warrewyk, was take; but sone after he was delyuered. This bataylle was done on Shroftwysday, the yere aboue sayde, the xvij. [[February 17th.]] day of Feuerer, in the whiche were slayne Ml.IX.C.xvj. persones.

Whan thys batayle was doon, London dredyng the manas and the malyce of the quene and the duke of Somerset and other, leste they wolde have spoyled the cyte,—for as moche as the quene with her [folio 213b]