'Oo, my frendez so fre, yor fare is to strange;
Dotz away yor derf dyn, and derez never my gestes.
Avoy! hit is yor vylaynye, ȝe vylen yorselven;
And ȝe ar jolyf gentylmen, yor japez ar ille. [MS. iapeȝ; M. iapes.]
Line 864
Bot I schal kenne yow by kynde a crafte þat is better: [folio 73a]
I haf a tresor in my telde of tow my fayre deȝter,
Þat ar maydenez unmard for alle men ȝette,
In Sodamas, þaȝ I hit say, non semloker burdes;
Line 868
Hit arn ronk, hit arn rype, and redy to manne;
To samen wyth þo semly þe solace is better.
I schal biteche yow þo two þat tayt arn and quoynt,
And laykez wyth hem as yow lyst, and letez my gestes one.'
Line 872
Þenne þe rebaudez so ronk rerd such a noyse,
Þat aȝly hurled in his erez her harlotez speche:
'Wost þou not wel þat þou wonez here a wyȝe strange?
An outcomlyng, a carle, we kylle of þyn heved!
Line 876
Who joyned þe be jostyse oure japez to blame,
Þat com a boy to þis borȝ, þaȝ þou be burne ryche?'
Þus þay þrobled and þrong and þrwe umbe his erez,
And distresed hym wonder strayt wyth strenkþe in þe prece,
Line 880
Bot þat þe ȝonge men, so ȝepe, ȝornen þeroute,
Wapped upon þe wyket and wonnen hem tylle,
And by þe hondez hym hent and horyed hym wythinne,
And steken þe ȝates ston-harde wyth stalworth barrez.
Line 884
Þay blwe a boffet in blande þat banned peple,
Þat þay blustered as blynde as Bayard watz ever;
Þay lest of Lotez logging any lysoun to fynde,
Bot nyteled þer alle þe nyȝt for noȝt at þe last.
Line 888
Þenne uch tolke tyȝt hem þat hade of tayt fayled,
And uch on roþeled to þe rest þat he reche moȝt.
Bot þay wern wakned al wrank þat þer in won lenged, [MS., M. wrank; M. note wrang(?).]
Of on þe uglokest unhap þat ever on erd suffred.
Line 892
