And much comfort in þat cofer þat watz clay-daubed.
Line 492
Myryly on a fayr morn, monyth þe fyrst,
Þat fallez formast in þe ȝer, and þe fyrst day,
Ledez loȝen in þat lome, and loked þeroute
How þat watterez wern woned and þe worlde dryed.
Line 496
Uch on loved oure Lorde, bot lenged ay stylle,
Tyl þay had tyþyng fro þe Tolke þat tyned hem þerinne.
Þen Godez glam to hem glod þat gladed hem alle,
Bede hem drawe to þe dor, delyver hem he wolde.
Line 500
Þen went þay to þe wykket, hit walt upon sone, [MS., M. walt; M. 2 in notes wafte(?).]
Boþe þe burne and his barnez bowed þeroute,
Her wyvez walkez hem wyth, and þe wylde after,
Þroly þrublande in þronge, þrowen ful þykke.
Line 504
Bot Noe of uche honest kynde nem out an odde, [folio 68a]
And hevened up an auter and halȝed hit fayre,
And sette a sakerfyse þeron of uch a ser kynde
Þat watz comly and clene—God kepez non oþer.
Line 508
When bremly brened þose bestez, and þe breþe rysed,
Þe savor of his sacrafyse soȝt to hym even
Þat al spedez and spyllez; he spekes wyth þat ilke
In comly comfort ful clos and cortays wordez:
Line 512
'Now, Noe, no more nel I never wary
Alle þe mukel mayny [on] molde for no mannez synnez, [M., Sk. insert on.]
For I se wel þat hit is sothe, þat alle mannez wyttez
To unþryfte arn alle þrawen wyth þoȝt of her herttez,
Line 516
And ay hatz ben, and wyl be ȝet, fro her barnage;
Al is þe mynde of þe man to malyce enclyned;
Forþy schal I never schende so schortly at ones
As dysstrye al for manez [dedes], dayez of þis erþe. [MS. synne inserted above line after manez; M., Sk. synne; M., Sk. insert in before dayez.]
Line 520
Bot waxez now and wendez forth and worþez to monye,
