Alle þat glydez and gotz and gost of lyf habbez, [folio 65b]
I schal wast with my wrath, þat wons upon urþe.
Bot my forwarde wyth þe I festen on þis wyse,
For þou in reysoun hatz rengned and ryȝtwys ben ever:
Line 328
Þou schal enter þis ark wyth þyn aþel barnez
And þy wedded wyf; with þe þou take
Þe makez of þy myry sunez; þis meyny of aȝte
I schal save of monnez saulez, and swelt þose oþer.
Line 332
Of uche best þat berez lyf busk þe a cupple;
Of uche clene comly kynde enclose seven makez,
Of uche horwed in ark halde bot a payre,
For to save me þe sede of alle ser kyndez;
Line 336
And ay þou meng wyth þe malez þe mete ho-bestez,
Uche payre by payre to plese ayþer oþer;
Wyth alle þe fode þat may be founde, frette þy cofer,
For sustnaunce to yowself and also þose oþer.'
Line 340
Ful grayþely gotz þis god man and dos Godez hestes,
In dryȝ dred and daunger, þat durst do non oþer.
Wen hit watz fettled and forged and to þe fulle grayþed,
Þenn con Dryȝttyn hym dele dryȝly þyse wordez.
Line 344
V. THE FLOOD
'Now, Noe,' quod oure Lorde, 'art þou al redy?
Hatz þou closed þy kyst wyth clay alle aboute?'
'Ȝe, Lorde, wyth þy leve,' sayde þe lede þenne,
'Al is wroȝt at þi worde, as þou me wyt lantez.'
Line 348
'Enter in, þenn,' quod he, 'and haf þi wyf wyth þe,
Þy þre sunez, wythouten þrep, and her þre wyvez;
Bestez, as I bedene have, bosk þerinne als,
And when ȝe arn staued styfly, stekez yow þerinne.
Line 352
Fro seven dayez ben seyed I sende out bylyve
Such a rowtande ryge þat rayne schal swyþe,
