Forþy so semly to see syþen wern none.
Þer watz no law to hem layd bot loke to kynde,
And kepe to hit, and alle hit cors clanly fulfylle.
Line 264
And þenne founden þay fylþe in fleschlych dedez,
And controeved agayn kynde contrare werkez,
And used hem unþryftyly uch on on oþer,
And als with oþer, wylsfully, upon a wrange wyse.
Line 268
So ferly fowled her flesch þat þe fende loked [MS., M. fende; Sk., E. fende[z].]
How þe deȝter of þe douþe wern derelych fayre,
And fallen in felaȝschyp wyth hem on folken wyse,
And engendered on hem jeauntez wyth her japez ille.
Line 272
Þose wern men meþelez and maȝty on urþe,
Þat for her lodlych laykez alosed þay were.
He watz famed for fre þat feȝt loved best, [MS., M., Sk. famed; M. note fained(?).]
And ay þe bigest in bale þe best watz halden.
Line 276
And þenne evelez on erþe ernestly grewen,
And multyplyed monyfolde inmongez mankynde;
For þat þe maȝty on molde so marre þise oþer, [MS., M. marre; Sk. marre[d].]
Þat þe Wyȝe þat al wroȝt ful wroþly bygynnez.
Line 280
When he knew uche contre coruppte in hitselven, [MS. coruppte; M., Sk. corupte.]
And uch freke forloyned fro þe ryȝt wayez,
Felle temptande tene towched his hert;
As wyȝe, wo hym withinne werp to hymselven:
Line 284
'Me forþynkez ful much þat ever I mon made,
Bot I schal delyver and do away þat doten on þis molde,
And fleme out of þe folde al þat flesch werez,
Fro þe burne to þe best, fro bryddez to fyschez;
Line 288
Al schal doun and be ded and dryven out of erþe [folio 65a]
Þat ever I sette saule inne, and sore hit me rwez
Þat ever I made hem myself; bot if I may herafter,
I schal wayte to be war her wrenchez to kepe.'
Line 292
Þenne in worlde watz a wyȝe wonyande on lyve,
