Wyth a wonder wroȝt walle wruxeled ful hiȝe,
Wyth koynt carneles above, corven ful clene,
Troched toures bitwene, twenty spere lenþe,
And þiker þrowen umbeþor wyth overþwert palle.
Line 1384
Þe place þat plyed þe pursaunt wythinne, [MS. þõ wt, M. þour-with; M. note þore(?).]
Watz longe and ful large and ever ilych sware,
And uch a syde upon soyle helde seven myle,
And þe saudans sete sette in þe myddes.
Line 1388
Þat watz a palayce of pryde passande alle oþer,
Boþe of werk and of wunder and walle al aboute;
Heȝe houses wythinne þe halle to hit m[a]d, [MS., M. to hit med; Fi. proposes ful hyȝe(!).]
So brod bilde in a bay þat blonkkes myȝt renne.
Line 1392
When þe terme of þe tyde watz towched of [þe] feste, [MS. towched quite clearly; M. to vsched; Fi. touched: M. reads þe feste, but in MS. both words are written at the end of 1392 above a break, and though some letters certainly precede feste, I cannot distinguish them.]
Dere droȝen þerto, and upon des metten,
And Baltazar upon bench was busked to sete;
Stepe stayred stones of his stoute throne.
Line 1396
Þenne watz alle þe halle-flor hiled wyth knyȝtes,
And barounes at þe sidebordes bounet a[y]where, [M. aywhere, but y blurred in MS. and very much like o.]
For non watz dressed upon dece bot þe dere selven,
And his clere concubynes in cloþes ful bryȝt.
Line 1400
When alle segges were þer set, þen servyse bygynnes,
Sturnen trumpen strake steven in halle,
Aywhere by þe wowes wrasten krakkes,
And brode baneres þerbi blusnande of gold; [folio 80b]
Burnes berande þe bredes upon brode skeles, [MS. þe þe.]
Line 1405
Þat were of sylveren syȝt, and s[e]rved þerwyth, [MS. seved with a flourish apparently over v, M. reads MS. severed, and prints seerved.]
