And alle þe maydenes of þe munster maȝtyly h[e] kyllen [MS., M. hokyllen, E. suggests hom kylled.]
Wyth þe swayf of þe sworde þat swolȝed hem alle.
Line 1268
Þenne ran þay to þe relykes as robbors wylde,
And pyled alle þe apparement þat pented to þe kyrke—
Þe pure pyleres [o]f bras portrayd in golde, [of, o blotted in MS.]
And þe chef chaundeler, charged with þe lyȝt,
Line 1272
Þat ber þe lamp upon lofte þat lemed evermore
Bifore þ[e] Sancta Sanctorum, þer selcouth watz ofte. [MS. þsancta, M. þ[e] sancta; MS. scor with abbrev. for um, M. sanctorum.]
Þay caȝt away þat condelstik, and þe crowne als,
Þat þe auter hade upon, of aþel golde ryche;
Line 1276
Þe gredirne and þe goblotes garnyst of sylver,
Þe bases of þe bryȝt postes and bassynes so schyre,
Dere disches of golde and dubleres fayre,
Þe vyoles and þe vesselment of vertuous stones.
Line 1280
Now hatz Nabuzardan nomen alle þyse noble þynges,
And pyled þat precious place, and pakked þose godes;
Þe golde of þe gazafylace to swyþe gret noumbre,
Wyth alle þe urnmentes of þat hous, he hamppred togeder.
Line 1284
Alle he spoyled spitously in a sped whyle
Þat Salomon so mony a sadde ȝer soȝt to make,
Wyth alle þe coyntyse þat he cowþe, clene to wyrke,
Devised he þe vesselment, þe vestures clene;
Line 1288
Wyth slyȝt of his ciences, his Soverayn to love,
Þe hous and þe anornementes he hyȝtled togedere.
Now hatz Nabuzardan num[men] hit al samen, [MS. nūnēd; M. numnend, but note nummen(?).]
And syþen bet doun þe burȝ and brend hit in askes.
Line 1292
Þenne wyth legiounes of ledes over londes he rydes,
Herȝez of Israel þe hyrne aboute;
