Ay folȝed here face, bifore her boþe yȝen;
Bot þe balleful burde þat never bode keped,
Blusched byhynden her bak, þat bale for to herkken.
Line 980
Hit watz lusty Lothes wyf þat over he[r] lyfte schulder [MS. he, M. he[r].]
Ones ho bluschet to þe burȝe, bot bod ho no lenger,
Þat ho nas stadde a stiffe ston, a stalworth image
Also salt as ani se, and so ho ȝet standez.
Line 984
Þay slypped bi and syȝe hir not þat wern hir samen|feres,
Tyl þay in Segor wern sette, and sayned our Lorde;
Wyth lyȝt lovez uplyfte þay loved hym swyþe,
Þat so his servauntes wolde see and save of such woþe.
Line 988
Al watz dampped and don and drowned by þenne;
Þe ledez of þat lyttel toun wern lopen out for drede
Into þat malscrande mere, marred bylyve,
Þat noȝt saved watz bot Segor þat sat on a lawe,
Line 992
Þe þre ledez þerin, Loth and his deȝter.
For his make watz myst, þat on þe mount lenged
In a stonen statue þat salt savor habbes,
For two fautes þat þe fol watz founde in mistrauþe:
Line 996
On, ho served at þe soper salt bifore Dryȝtyn,
And syþen, ho blusched hir bihynde, þaȝ hir forboden were;
For on ho standes a ston, and salt for þat oþer,
And alle lyst on hir lik þat arn on launde bestes.
Line 1000
Abraham ful erly watz up on þe morne,
Þat alle naȝt much niye hade nom[e]n in his hert, [MS., M. no mon, M. inserting [so] after naȝt; Fi. would omit alle; E. suggests nomon (see note).]
Al in longing for Loth leyen in a wache,
Þer he lafte hade oure Lorde, he is on lofte wonnen;
Line 1004
He sende toward Sodomas þe syȝt of his yȝen,
Þat ever hade ben an erde of erþe þe swettest,
As aparaunt to paradis þat plantted þe Dryȝtyn;
