godmod ros of bedde
wiþ armes he him shredde
Line 848
his brunye he on caste
& knutte hit wel faste
ant com him to þe kynge
at his vp rysynge
Line 852
kyng quoþ he com to felde
me forte byhelde
hou we shule flyten
ant to gedere smiten
Line 856
¶ riht at prime tide
hy gonnen out to ryde
hy founden in a grene
a geaunt swyþe kene
Line 860
his feren him biside
þat day forto abyde
Godmod hem gon asaylen
nolde he nout faylen
Line 864
He ȝef duntes ynowe [folio 88b]
þe payen fel yswowe
ys feren gonnen hem wiþ drawe
for huere maister wes neh slawe
Line 868
he seide knyht þou reste
a whyle ȝef þe leste
y ne heuede ner of monnes hond
so harde duntes in non lond
Line 872
bote of þe kyng Murry
þat wes swiþe sturdy
he wes of hornes kenne
y sloh him in sudenne
Line 876
¶ Godmod him gon agryse
ant his blod aryse
byforen him he seh stonde
þat drof him out of londe
Line 880
ant fader his aquelde
he smot him vnder shelde
he lokede on is rynge
ant þohte o rymenild þe ȝynge
Line 884
mid god suerd at þe furste
he smot him þourh þe huerte
