Horn tok þe maisteres heued,
Þat he hadde him bireued,
& sette hit on his swerde
Anouen at þan orde.
Line 624
He verde hom in to halle
Among þe kniȝtes alle.
'Kyng,' he sede, 'wel þu sitte
& alle þine kniȝtes mitte;
Line 628
To day, after mi dubbing, [folio 9b:1]
So irod on mi pleing,
Ifond o schup Rowe
Þo hit gan to flowe,
Line 632
Al wiþ sarazines kyn,
& none londisse Men,
To dai for to pine
Þe & alle þine.
Line 636
Hi gonne me assaille,
Mi swerd me nolde faille,
Ismot hem alle to grunde
Oþer ȝaf hem diþes wunde.
Line 640
Þat heued i þe bringe
Of þe maister kinge.
Nu is þi wile iȝolde,
King, þat þu me kniȝti woldest.'
Line 644
A Moreȝe þo þe day gan springe
þe king him rod an huntinge;
At hom lefte ffikenhild,
Þat was þe wurste moder child.
Line 648
Heo ferde in to bure
To sen auenture:
Heo saȝ Rymenild sitte,
Also he were of witte:
Line 652
Heo sat on þe sunne
Wiþ tieres al birunne,
Horn sede, 'lef, þinore,
Wi wepestu so sore?'
Line 656
