þis semiþ be ensaumple of Crist, for he wold not curse hem þat denoied to him harborow and lifelod, but reprouid his disciplis [Luc. ix.] askyng veniawns; and wan he was waried he waried not aȝen, [1 Pet. ij.] wan he was punischid, he manest not aȝen, but mekly be toke him|silf to him þat iugid him vniustly; and þe peyn of oþer synne bare, and prayed for his cruciars.
Also be ensaumple of Moyses, wan þe peple synnid in to God, he vengid it; and wan þei greuid him he þolid, and ȝaue þe cause to God.
Also it be howuiþ þo synne to be notory and greuows, for wilk cursyng schuld be done. Were þe Archedecoun seiþ, þat þe more [Archede|coun.] curse is to be ȝeuun for contumacy alone; and þis he groundiþ be mani lawis. And al oþer lawis þat semen to sey, þat man how to curse for crime of vowtre, þeft, and swilk oþer; so þat vndir|stond for contumacy descendend of swilk crime. And he seiþ Lincoln to be of þe same sentence, and Innocent, seing þat man is [Lincoln.] not to be cursid only for þe crime, if he wil amend him. And þe [Innocent.] sentence of Crist acordiþ in þe gospel; were cursing is groundid. Were for þe kirk seiþ, None of bischoppis priue ani man fro comyn|ing of þe kirk, wiþ outun certeyn and opun cause of synne. [The kirk.] And resoun is þis, for ilk cursing vniustli also cursiþ himsilf, for he synniþ dedly. And Austeyn seiþ, as is be for seid: No man mai [Austeyn.] noye kynd of God.
Of þe wilk semiþ þre notable conclusiouns: first, þat God mai not curse ani man ne suffur him to be noiȝed to his pering, but himsilf be first in cause; for þe curse of þe kirk takiþ not a wey riȝtfulnes ne vertu, ne inferriþ not synne, but schewiþ departing fro comyn of seynts, and defendiþ medicinable comyning wiþ þe kirk or sacraments of it. Were for seiþ Archedecoun, efter þat he [Archede|coun.] schewiþ þat þe keyes of þe kirk only byndun and lousun, wan þei are confermid to þe keyes of Crist, þat bynding or lousing of þe prelat is not þe cause why ani is lousid or boundun in heuin. But
