gedrid to gidir in Cristis name, and of þe kirk; or if it be a per|sone ordeynid to do ani þink in þe name of Crist and of þe kirk, he mai no þing do iustli, but in maner befor seyde, þat Crist do it bi him.
And þus is opun þat þe kirk mai not iustli curse ne bles, but as he haþ befor ordeyned to be doun, and do it be þe kirk; þe kirk mai not ellis curse iustli, þat is noþer sequester ani man fro comyning of feiþful men, ne fro part takyng of sacraments, ne for bid him ne to do ani þing, ne joyn him penaunce, ne denounce, put out of comyn, ne bid iuil to him, ne curse him in ani maner, be wat nam þat cursing be callid; þe kirk may not do it iustli, ne vnblamfully, not but in als mikil as Crist haþ ordeynid to be doun, and doiþ it bi þe kirk, and confermit it. And riȝt so of soiling; oþer wis may not þe kirk bring a man out of synne, ne forȝef þe peyn, nor man siker, ne pronounce, ne hiȝt him to be soylid, in ani maner for ani cause. Ne oþer wyse howiþ ani man to dred ani curse, not but in als mikil as it is ȝeuen vp Cristis bidding, ne oþer wise ioi of assoiling; ne reste hemsilf siker þer for. Oþer wyse ow ȝe not to drede it; þat is, ȝe ow not to drede it þat it schal greue ȝow, or noy ȝow, as at God to mak ȝow sinful, or to be punischid, nor ȝe ow not cesse, ne abstene fro ani good wark, but vp þat Crist for bediþ it him. þis sentence is clere of manifold witnes of þe feiþful opunning of holi writt, and publischid expresly and ympliȝeþly, and of þe sawis of feiþful doctours, witnessing and expounding; and of þe decreis of þe kirk conferming. In canoun it is writun þus, of þe words of þe pope Leoun; Þe priuylege of [Leoun.] Petre dwelliþ were euer þe dome is ȝeuen aftir his equite, þat þe fersnes be noþer to mikil ne to litil, were no þing schal be bounde ne lowsid, not or Petre byndiþ or lowsiþ. Who euer deserue to tak þe sentence of daming, if he wele perseyuer in his wit, no man mai relesse him. And also Jerom seiþ, If ani man be put out [Jerom.] nouȝt be riȝt dome of hem þat are abouen to þe kirk, if he went
