him þo comyn feleschip of feiþfulmen, and taking of sacraments, þat he do þe raþer penaunce, and infect not oþer, and þat þis be ritful boþ up þe side þat is cursid and up on þe kirk side cursing, be howfiþ þe kirk to temt warly. For as þre condicouns mak martirdom faire, þat is to sai, riȝtwisnes of þe cause, charita|ble pacience of þe martir, an vnriȝtwisnes of þe persewar, and so þat cursing be riȝtwyse longen in a contrari maner; þat is to say, riȝtwisnes in the kirk cursing, cause of vnriȝtwisnes in þe man cursid, and enemy of þe obstinat. And þus it may be, þof þe kirk curse a iust man iustly, as to form of vsing of lawe; naþles it is not iustly as to þe cause of soþfastnes, nor it may not, wyle þer is no cause of vnriȝtwisnes in þe man, ne obstynacy, ne ritwisnes in þe kirk, þus doing; þat is, wile God biddiþ not þe kirk curse, þus þe vnriȝtwisnes of þe cause is synne going biforne, for wilk þe man schuld be cursid. Enemy of þe obstinat, wan þe synnar wil not dewli obey ne a mend. Riȝtwisnes of þe kirk doing execucoun is wan þe kirk a cordiþ wiþ Crist, and þe kirk aboue; of mek charitable feiþful entent, þenkyng helful correccoun of þe synnar to þe honor of God, procediþ in dewe ordre up þe gospel.
But, for to haue þe more clere and vndeceyuid knowyng of þis mater, cursing and assoling in mater of domis, and geuing of sentence in ani maner of dome, priuey or comyn, and in mater witnessing, and in materis to be don, þolid, susteynid, aprouid, confermid, canoniȝid, autenkid, or to be helpid, in ani maner of cause a geyn ani man, or for ani þing, me semiþ now spedy to sey summe þings.
First, I tak as feiþ, þat no creature mai do iustli, wele, meri|torili, perfitly, vnsinfully, effectuali, ne perseuerantli ani þing, not but if God wirk þat þing bi him, and in him; þat if he do, or pre|sume to do þis þat God wirkiþ not bi him, he synneþ, and his wark schal be in veyn, and idil, and schal not stond in profit. þis semiþ þus, Crist miȝt not, þan mikil more non oþer creater mai þat Crist
