And þus he went wiþ out ordres. And nowe how þe pricis are ekid, and how mykil him behowuiþ to ȝeue þat schal geit ben|fics, þei telle þat bring swilk new þingis fro þe cowurt.
Nowe ilk man discuse wedir swilk marchaundis be synful, and ai be war of þe perel, and see þat we sey no fals witnes a geyn ani man, but ioi we euer to gidir in trowþ.
III. Of cursing twey points. 1. þat þe ministris of þe kirk owe not to curse. 2. þat þe kirke may not rizt|wisly curse a riztwys man.
Of cursing twey poynts.
A noþer is þis þat is put and askid, þat þo minstris of þe kirke owe not to curse and to wari.
Certs to þis I sey þei owe boþe to curse and wari, but neuer for iuil wille ne veniaunce, but for luf of ritwisnes. And raþer for þe breking of þe bidding of God, þan for worldli goodis or pride of þe world and flescli lust.
An oþer is þis þat is putte, þat þe kirke may not riȝtwisly curse a riȝtwys man. To þis I seid þus, þat in two maner of þing, is seid iust; first sympli, or after trowþ, as þat vnrytwysnes is not inne. In þe secound maner is a man seid iust, onli in name or aftir present riȝtwisnes. And þus as doctors seyn, a sentence of cursyng is seid to be ȝeuun justli, on two maners. On after trouþ, wan it is don wit just cause, juste ordre, and iust entent. A noþer, wan it is don onli up on comyn form o lawe. And þus it may be as it semiþ sum tyme, þat þow þe kirke curse iustli, as to form, a iust man, neþles it [is] not iust as to soþfastnes; as wan þer is no cause of þe fulnes of þe kirke cursing: vnriȝtwisnes of þe cause is þo syn going be for of þe obstinat, wan þe synnar wil not dewli obey ne amend riȝt. þat is þat þu dost þo dom in nam of þe kirke, feiþfully wilyng þe mendment of þe synnar, helful, to þe worschip of our Lord Jhu Crist, and due ordre procedand up þe gospel. But suppose her þat þis iust is þat is ordeynid be God to do a þing, or to suffre, to comyn, or to minister in ani maner, or ȝend in þe nam of Crist, and he willing to perform obediently and fille þe wark þat
