HERE are questiouns and ansueris putte þat are writun here aftir.
First, I witnes bifor God Almiȝty, and alle trewe cristunmen and wommen, and ȝowe, þat I haue not ben, nor is, nor neuer schal, of myn entent ne purpos, to sei any þing aȝen þe general feiþ; neiþer entent to bigile, or deseyue, ani man or womman, in ani vnprofitable to perpetual ȝel of soule; ne agein seying to þe wordis, ne sentence, of ani seint, seying feiþfulli. But if þei sem ani tyme to uari, onli in word, I purpos to take and vndirstond her wordis to veri and feiþful witte, and so to acorde hem to gidir, and to acord wiþ ilke of hem in ilke trowþe. Preying also ilke man to reduce me in to þe riȝt wey aftir þe gospel of our lord Jhu Crist, and wey of þe apostlis, prophetis, and doctours, if I haue gon biside þe wey, in ani þing in þeis pontis, or in ani oþer, to be put forþ heraftir; knouing, if I finali abode in error, I were to be punishid perpe|tuali.
I. The Pope not the vicar of Crist, nor of Pe|tir.
On þat is put is þis; þat þe pope is not þe vicar of Crist nor of Petir. I knowlech to a felid and seid þus, wan he filliþ not in dede, ne in word, þe office of Petir in ȝerþ, ne doiþ not þe þing in þat office þat he is holden to do: but doþ contrarili, and so in dede he is not þe vicar of Petir in dede. And þis steriþ me to fele þus:
