The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

Trescher syr, Je vous salue enterement, et vous pry cherment qe vous croies le portour de cestes, Esmond Gifford, de la matere tochant une prestre, qe a nom syr William Drayton, qe demert ou mon trescher frere, mon syr Richard Alberbury, et ou ma dame sa femme, qe fause|ment est emprisone: et vous pry cherment qe vous ly fases le ben qe vous poes pur lamour de moy et de mon syr Richard. Le sente espirte (sic) vous encrese en honours.

Trescher amy voilletz saver que nostre seignur le Roi nous ad maunde certeyns commissions a vous et autres directes pur taxer et assesser totes maneres de gentz en le counte d'Oxenfort, ovesque un brief de prendre le serment de vous et vos compaignons ove tote le haste que purra estre fait. Pur quei nous prions et chargeons de par mon seignur le Roi que vous soietz a nous a Abyndon sur ceste dymaynge proscheyn avenir apres la date de cestes a prendre vostre serment et vostres commissions saunz ascunes delay ou excusacion: issi quee nostre defaute notre syre le Roi ne soit disseu tarye ne ni delaye de ceo qest a vous graunte. Tres|cher amy la seint esprit vous eit en sa garde.

Escrit a Abyndon le xvme jour de Juyn.