The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

yn þe reverens of God remembret yowr sylve to labor to be scherve: for hyt well gete yow a quayntens, and hyt ys beter to goveryn then to be goveryed. No mor on to yowr Maysterchepp at þis tyme, but Jhesu preserve yow ever. Amen. I-wrethen at Modbere on Synt Luke ys yeve.

Ryȝth reveryend Mayster, I recummende me to yowr Maysterchep &c. I have ben with my Maysteres, yowr Moder, and ther I schall never come mor by þe grace of God, for I was falsse varlet, theffe, and her traytour, and God yove me grace þat I never methe with her more, ffor I have the namys of yowr bredren and sosteren. As ffor her armys I have hyt not, bot þe lord Mese woll bryng ham to yow &c. Also, rememberyt to wrythe to Mayster Wageth as for Flethe and Forde to be Tedyngman and sewtey to yowr cerche of Ermeton. Also, I wolde ye wolde to sewe to be scherve of [Shynner began to write "Dewen" (Devonshire), but crossed it out.] owr scher, for me semyt hyt wolde be presentabell and to gethe a quayntans, love, and drede withyn þis scher, and rememberyt how mene worchepfull men have be schervys of þat scher, bothe of yowr contre and of þis. And yef yowr Maysterchep have hyt I wolde beseche yow to have a offyce as for a kynnysman of myne to be cryer of þe scher &c.