The body of the letter and the signature are all in the same hand, which is unusually good and probably that of a professional scribe. From A.C., xlvi, 134.
Ryght reverent and worschypfull brother, I recomende me unto yow as hertely as I can: thankyng yow of yowr good brothyrhed to me before thys tyme schewyd, wyche I pray yow of contynuance: lettyng yow wytt, as I ham informyd, that my husbonde be the mevyng, pro|curyng, and struyng of my lady hys modyr, that they wull syll serteyne of my husbondes lyvelode: what hytt ys I cannot informe yow, but as a credebyll man that schulde know be my reson hytt schulde be Henton: wherfor I beseche yow and requyre yow, as ye ar a trewe Goddes knyth and the Kyngges, that ye avyse and cownsell my seyde husbond the contrary, so beyng dysposyd, as my very tryste is in yow: for I thonke God we have feyr yssew, and by possybylyte be lyke to have: and I beseche yow that thys seyde cownsell and avyse cum by your selfe, and not of me in no wyse. And I shall pray to God for yowre honor and welfare, wyche preserve yow bodely and gostely. I|writyn att Lytyll Haseley the Tewseday before the feste of seynt Hewe the bysshoppe.
By your owne syster, Mare Barantyne.
To my rygth reverent and worshypfull brothyr, Syr Willm. Stonor, knyth, be thys bylle delyverede.
