The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

I shal speke for þe spede þerof, so þat y trust your servaunt commyng þerwith shal not be taried. John Daunce shal to morrowe to Ricote and labour to gete you a copie of Quatermayns patent. Yf hit may be goten ther, William Lentalle, your servaunte, can advise you how ye may gete hit from Herry Davers: for Lental telled me þis same day he supposeth þat Herry hath hit. Yf hit may not be goten of hym, let Lental remember þe Scrivener þat made Maister Foulers patent, with whom y suppose a mynewte or copie resteth, and ther dooth hym to fette hit. I sende you herynne enclosed a copie of the wordes entred by Maister Auditour for þe allowaunce of þe Stewardes ffee, upon þe which copie ye may conceive your patent by counseile lerned, yf þe remanent faile. Oure lord kepe you. At Thame, in hast þe xvjth daye of Novembre, with þe owne hande of hym þat is yours to my litle poer.

My good and feythfull maister, I recomaund me to yow with all my service. I undirstond by your writeyng that the Kyng and oþer the lordes be right well plesid with your worshipfull demenyng: of the wheche I am right glad. And also that my lord Chaunceler is your good lord and councellyth you to your grete worship and avayle. God defende yow fro sinustre councell. My said lordes advyse and councell is full frutes and profitable for yow, as I have hadde very knowleche: I pray God contynue hym. And where ye like to write to me to come to your maistershep I was not wele disposed to ride this many day, as Godd knoweth. Praying yow that ye woll take no displeser, I send yow by my servaunt xx markes: I have right lytyll mone; how be hit yef ye nede I woll purvey more ayenst Monday next, and send hit to your maistershep with Goddes mercy, who ever preserve