The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

wyche I wrothe a bylle unto William Platys off that he schulde resayve yt at Hendelay and so conevay yt unto Stonor. Fordermore, lady, ye schalle understonde that maysterys Hane, your dowter, ys all moste hole, thankyd by Jhesu, and sche hys very mery. All so, lady, I beseke your goode ladyschype that I mythe have cnowlage whedir that ye wollede have hany bere or hale, that I schulde take in ayenst your comyng home unto London. No more unto your ladyschype at thys tyme but Jhesu have you in hys kepyng. Wretyn at London the ffyrst day of Agust.

Ryght enterly and my moste specyall belovyd husband, I recomaunde me to yow yn the moste harty wyse, desyryng to here of yowre welefare &c., thankyng yow of yowre lettyr and of yowre partrechys. And for Robert Warner, he ys cum to towne: dyverce of yowre servantys and myne have spoken with hym: he seyeth that he can receyve no money as yet, notwithstondyng he yntendyth to speke with me or he departe, and wyll content me yef he may. I pray God that he may so do. Also I pray yow to send me a answere of the mater that I wrote to yow for the Lumbarde. And yef hyt myght plese yow to take the labur to ryde ovyr, then ye may answere to the mater yowre selfe, whyche wyll be to me grete hartes ese and plesure: for I thynke hyt ryght longe syth I speke with yow. Syr, I truste to Jhesu to se yow here yn shorte