The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

Ryght worshipfull and entierly wel-beloved Nevew, in my most feythe|full wyse I recommaunde me to yowe. And pleaseth yowe to wete þat I entended verreyli to have be with yowe this afternone for suche persones as will be with yowe to be suretees for Joy: but it is so þe wether is suche þat I dare not ryde: wherfor I beseche you to have consideracion to alle the premysses, and þat ye lyke to take surete for þe pore man þat he may goo at large. And also þat ye lyke to wryte a letter to Herry Doget to deliver hym. And Jesu preserve you. In hast this same Saterday.

Ryght worshypfull Syr and welbelovyd, aftyr commendacion and thankes for yowr kyndenes partly showid afore þis tyme, but mor speciallye for tyme comyng: I pray yowr mastreshyppe to remembre me of my hawke by yow to me now of late promysid, for the which y send to yow accordyng to yowr will my servant yn this behalfe, a prest, to whom y pray you to delyver the seide byrd: for as now y dowte not but ye will satisfie my desire, of the which y specyally praye yow as ye shall have my servyce yn tyme comyng for ever, by Goddis grace, to whom I commyt yow, Amen. From Bukyngham yn hast, þe xxv day of Maii.