The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

broken and sent me hiddyr to London by the next that comethe. Also, madame, I have spoken with Laurence Fyncham ffor the xviij. li. due by Mayster Hampton, and he tellith me pleynly that mayster Hampton will geve no more but xiiij. li. ffor them, that is after iiij. s. the unce: and yff ye will nat so, ye shall have your baysens agayn. And þerffore, looke how you þinke best, and þerafter send me word, and I shall doo þerin as I wold doo ffor my selff. I spake unto my lady your modyr on seynt Thomas daye, [21 December.] and she wold scarsely oppyn hir mouthe unto me: she is displesid and I know nat whereffore, with owte hir old sekenes be fallen on hir agayn: God send hir ones a mery contenaunce, and a ffrendely tonnge, or elles shortly to þe mynnorres, wheroff she waxhith wery now, as it was told me but late. I am wrothe with Kateryne, by cause she sendith me no writtynge: I have to hir diverse tymes, and ffor lacke off answere I wax wery: she myght gett a secretary, yff she wold, and yff she will nat it shall putt me to lesse labour to answere hir lettres agayn. Madame, I beseche the blissid trenyte to send you a Mery Cristymas to your hartes ease, and ever to preserve and kepe you in longe helth and vertu. At London the xxij day Discembre.

Worchypfull Cossyne, I recomaund me unto yow, and I pray yow hartely, cossyne, to come heder thys nyte or to-morow by tymesse, both for þe mater off my nefew, and also for þe mater that I desyred yow, asse my truste yn yow, or asse I may do thynge to yowr plesur, þe weche to do I wold be glad, God knowthe, ho have yow yn ys kepinge.